رات کی پرسکون نیند ایک نعمت ہے۔ رات بھر سکون سے سونے کے بعد صبح اٹھتے ہی اگر غیر مناسب حالات کا سامنا کرنا پڑے تو رات کی پرسکون نیند بے فائدہ ہوجاتی ہے اور پورا دن بے کار گزرتا ہے۔
بعض لوگ نیند سے اٹھ کر ایسی غلطیاں کرتے ہیں جو ان کی صحت کے لیے نقصان دہ ثابت ہوتی ہیں۔ آئیے جانتے ہیں وہ غلطیاں، شاید آپ بھی ان غلط عادات میں مبتلا ہوں۔
آنکھ کھلتے ہی کام کرنا
جیسے ہی آپ کی آنکھ کھلے ویسے ہی بستر سے اٹھ کر کام شروع کردینا پشت کے مسلز کے لیے نقصان دہ ہوتا ہے۔ ساری رات حالت آرام میں رہنے کے بعد جسم سست ہوتا ہے اور فوری طور پر کام کرنے کے قابل نہیں ہوتا۔
نیند سے اٹھنے کے 1 سے 2 گھنٹے بعد کام شروع کریں۔
بھوکا رہنا
بعض لوگ صبح اٹھنے کے بعد بھوک محسوس نہیں کرتے چنانچہ وہ دن کا سب سے اہم کھانا یعنی ناشتہ چھوڑ دیتے ہیں۔ ناشتہ کرنا بے حد ضروری ہے لہٰذا اگر بھوک نہ لگے تب بھی ناشتہ ضرور کریں۔
الارم کو ’سنوز‘ کرنا
اگر آپ الارم کے بجتے ہی اسے ’سنوز‘ پر لگا کر دوبارہ سوجاتے ہیں اور 10 منٹ بعد الارم دوبارہ بج اٹھتا ہے، اور یہ سلسہ آدھے گھنٹے تک جاری رہتا ہے تو جان لیں کہ آپ اپنی صحت کے ساتھ دشمنی کر رہے ہیں۔ ماہرین کے مطابق الارم کی پہلی گھنٹی پر اٹھ کر بستر پر بیٹھ جانا زیادہ مفید ہے۔
بار بار الارم بجنے سے نہ تو آپ ٹھیک سے سوپاتے ہیں اور نہ جاگ پاتے ہیں، یوں آپ کا دماغ تھکن کا شکار ہوجاتا ہے اور آپ سارا دن غنودگی محسوس کرتے رہیں گے۔
ورزش نہ کرنا
ورزش کرنے کے لیے سب سے مناسب وقت صبح کا ہے۔ اگر آپ دن کے کسی اور حصے میں ورزش کرتے ہیں تو یہ جسم کے لیے اتنی فائدہ مند نہیں جتنی صبح کی ورزش ہے۔
بعض لوگ شام کے وقت ورزش کرتے ہیں۔ یہ ورزش ایک تھکن زدہ دن گزارنے والے جسم کو مزید تھکن کا شکار بنا دیتی ہے لہٰذا اس سے گریز کریں۔
تو پھر کیا خیال ہے؟ کیا آپ اب بھی یہ غلطیاں کریں گے؟
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
