اسلام آباد : فتنہ الخوارج کے انتہائی مطلوب ملزم کو کراچی سے گرفتار کرلیا گیا ، اللہ خان عرف عبداللہ محسود سے اسلحہ وبارودی مواد برآمد ہوا۔
تفصیلات کے مطابق رینجرز اور پولیس کی انٹیلی جنس معلومات کی بنیاد پر اتحاد ٹاون میں مشترکہ کارروائی کرتے ہوئے فتنہ الخوارج سے تعلق رکھنے والا انتہائی مطلوب ملزم اللہ خان عرف عبداللہ محسود گرفتار کرلیا۔
ترجمان رینجرز نے بتایا ملزم کے قبضے سے اسلحہ ا ور ایمونیشن بھی برآمد کر لیا گیا ہے ، ملزم کا تعلق فتنہ الخوارج مفتی نور ولی عرف ابو عاصم گروپ سے ہے۔
ترجمان کا کہنا تھا کہ ملزم 2008 میں فتنہ الخوارج، جنتہ جنوبی وزیرستان کے کمانڈر محمد امیر محسود کے گروپ میں شامل ہوا اور وزیرستان میں فتنہ الخوارج کی متعدد کارروائیوں میں شامل رہا۔
ملزم کمانڈر محمد امیر محسود کے کہنے پر کرم ایجنسی میں مذہبی فسادات میں شامل رہا اور وزیرستان میں دہشتگردوں کے خلاف آپریشن شروع ہونے کے بعد فرار ہوگیا۔
گرفتار ملزم اپنی فیملی کے ہمراہ ٹانک شفٹ ہوا ، بعد ازاں کراچی ہزارہ کالونی بلدیہ ٹاوٴن میں شفٹ ہو گیا تھا ، ملزم کراچی سے متعدد بار وزیرستان گیا اور فتنہ الخوارج کے ساتھ مل کر سہولت کاری کا کام کرتا رہا ہے۔
ترجمان رینجرز کا کہنا ہے کہ ملزم کا قریبی رشتہ دار کمانڈر عبداللہ شاہ فتنہ الخوارج کا انتہائی مطلوب دہشتگرد ہے، جو افغانستان سے پاکستان کے اندر عسکری کارروائیاں کرنے کے لیے انتہائی متحرک رہا،۔
فتنہ الخوارج کا ایک اور انتہائی مطلوب دہشتگرد شاہ ملوک عرف محب ملزم اللہ خان عرف عبداللہ محسود کا قریبی ساتھی ہے، ملزم اس سے مسلسل رابطے میں تھا ملزم دہشتگرد شاہ ملوک عرف محب کے لیے سہولت کاری کا کام سرانجام دے رہا تھا۔
دہشت گرد شاہ ملوک عرف محب 2024 میں تین مرتبہ دہشتگردانہ کارروائیوں کے عزائم کے لیے کراچی آ چکا ہے اور ابھی وزیرستان میں سیکیورٹی فورسز کے خلاف دہشتگردانہ کارروائیوں میں متحرک ہے۔
ترجمان رینجرز کے مطابق ملزم اور اس کے ساتھی پاکستان بالخصوص کراچی میں دہشت گردی کی متعدد کارروائیوں میں ملوث ہیں، گرفتارملزم کو مزید قانونی کارروائی کے لیے پولیس کے حوالے کر دیا گیا ہے۔
