اسکول کی طالبہ کی ماں نے بس ڈرائیور کے اقدام پر سیخ پا ہو کر بچوں سے بھری بس پر اس پر حملہ کردیا جس کی ویڈیو وائرل ہوگئی۔
امریکا کی ریاست ایریزونا سے تعلق رکھنے والی اسکول طالبہ کی ماں کو ایک اسکول بس ڈرائیور سے بدتمیزی اور اس پر حملہ آور ہونے کے الزام میں گرفتار کیا گیا ہے، مذکورہ واقعہ اس ماہ کے شروع میں پیش آیا تھا۔
27 سالہ ماں ہرمینگلڈا مارکیز کو اس بات پر غصہ تھا کہ بس ڈرائیور نے اس کی بیٹی سے غلط طرح سے بات کی ہے اور اسے بس سے جلدی اترنے کے لیے کہا ہے۔
پولیس کی جاری ویڈیو میں مارکیز بچوں کو ہٹانے کی کوشش کرتے ہوئے اور چیختے ہوئے بس ڈرائیور کی طرف بڑھ رہی ہے۔ وہ بس ڈرائیور کو کہتی ہے کہ کیا تم میری بیٹی کے بارے میں بات کر رہے ہو؟
اس دوران دو دیگر والدین بھی بس کے دروازے پر نمودار ہوتے ہیں اور شکایت کرتے ہیں کہ ڈرائیور نے بس کو غلط جگہ پر روکا ہے۔
میڈیا رپوٹس کے مطابق، 27 سالہ ہرمینگلڈا مارکیز پر اسکول کے ایک ملازم پر سنگین حملے کا الزام ہے جبکہ حملے کے وقت مذکورہ لڑکی کا بوائے فرینڈ بھی وہاں موجود تھا جس نے اسے پکڑ لیا اور وہاں سے کھینچ کر لے گیا۔
عدالتی دستاویزات میں بتایا گیا ہے کہ 64 سالہ بس ڈرائیور ایک متبادل بس ڈرائیور تھا جو عام طور پراس روٹ پر بس نہیں چلاتا تھا۔
پولیس ڈیپارٹمنٹ کی طرف سے فراہم کردہ دھندلی ویڈیو میں دیکھا جاسکتا ہے کہ مارکیز 11 اپریل کو بس میں داخل ہوتے ہوئے ڈرائیور پر چیخ رہی ہے۔
مارکیز متاثرہ ڈرائیور کے سر اور چہرے پر بار بار تھپڑ مارتی ہے اور پھر ہاتھوں کو مکا بنا کر متاثرہ ڈرائیور کو دونوں ہاتھوں سے مارتی رہتی ہے۔
عدالتی دستاویزات کے مطابق مارکیز اور اسکا بوائے فرینڈ پولیس کے جائے وقوعہ پر پہنچنے سے پہلے ایک کار میں فرار ہو گئے تھے تاہم لڑکی کو گزشتہ ہفتے گرفتار کیا گیا تھا۔
