سڈنی: آسٹریلیا میں آتشزدگی کا واقعہ پیش آیا، ماں کی غفلت کے باعث جڑواں بچیاں آگ کی لپیٹ میں آگئیں۔
غیرملکی خبررساں ادارے کی رپورٹ کے مطابق آسٹریلوی ریجن ’بٹلو‘ میں گھر میں آگ لگنے کے خطرناک حادثے نے دو کمسن بچیوں کی جانیں لی لیں، ماں دونوں بچیوں کو گھر میں اکیلے چھوڑ کر باہر گئی تھی۔
رپورٹ کے مطابق ایشا اور لیلانی نامی دونوں جڑواں بچیاں آتشزدگی کے ہولناک حادثے میں ہلاک ہوگئیں، ابتدائی رپورٹ میں کہا گیا ہے کہ بچیوں کی موت آگ لگنے کے بعد دم گھٹنے سے ہوئی۔
ہلاک ہونے والی بچیوں کی عمریں 3 سال تھی، اور دونوں گھر میں بستر پر تکیے سے کھیل رہی تھیں، حادثے کے بعد دونوں بچوں کے پاس سے جلا ہوا تکیہ بھی برآمد ہوا، اس واقعے سے ماں پر قیامت ٹوٹ پڑی ہے۔
پولیس کا کہنا ہے کہ گھر میں آگ تقریباً 5 منٹ تک لگی رہی بعد ازاں ریسکیو عملے نے فوری طور پر آگ پر قابو پایا اور کولنگ کا عمل شروع کیا بدقسمتی اس وقت تک بچیاں ہلاک ہوچکی تھیں۔
پولیس کے مطابق ’مس فورڈ‘ نامی ماں آتشزدگی کے دوران سوائے گھر کو جلتا دیکھنے کے اور کچھ نہ کرسکی۔
