لاہور : موٹر وے پولیس ایم 5 نے فرض شناسی اور بہادری کی مثال قائم کردی، بس کے نچلے حصے میں لگنے والی آگ کو پھیلنے سے روک کر کئی مسافروں کی زندگی بچالی۔
اے آر وائی نیوز کی رپورٹ کے مطابق ترجمان موٹر وے پولیس کا کہنا ہے کہ اہلکاروں نے بس کے ٹائر میں لگی آگ کو فوری بجھا کر مسافروں کو جلنے سے بچا لیا۔
مذکورہ مسافر بس ہارون آباد سے کراچی جارہی تھی کہ گدو مووی پوائنٹ پر پٹرولنگ کی ڈیوٹی پر مامور افسر باسط علی نے بس کے نچلے حصے میں لگی آگ کو دیکھا۔
ترجمان کے مطابق پٹرولنگ افسران نے فوری طور پر کارروائی کرتے ہوئے آگ بجھانے والے آلات کی مدد سے آگ کو بجھا دیا۔
مسافروں اور بس عملے نے جان بچنے پر موٹر وے پولیس کی فرض شناسی کو قابل فخر قرار دیتے ہوئے ان کا شکریہ ادا کیا۔
ترجمان کا مزید کہنا ہے کہ ایڈیشنل آئی جی علی احمد صابر اور ڈی آئی جی دار علی نے پٹرولنگ کرنے والے ان افسران کی اس کاوش کو سراہا اور شاباش دی۔
واضح رہے کہ گزشتہ ہفتے موٹر وے ایم 14 پر کوئٹہ سے اسلام آباد جانے والی بس حادثے کا شکار ہوگئی تھی جس کے نتیجے میں 2 افراد جاں بحق اور 2 زخمی ہوئے۔
ترجمان موٹر وے پولیس نے بتایا کہ حادثہ بس ڈرائیور کو نیند آنے کی وجہ سے پیش آیا تھا جس کے باعث بس بے قابو ہوکر الٹ گئی تھی۔
