لاہور : سڑک پر سفر کرنا پھر مہنگا کر دیا گیا، نیشنل ہائی وے اتھارٹی نے متعدد قومی شاہراہوں اور موٹر ویز کے لیے ٹول ٹیکس کی شرح میں اضافے کا اعلان کیا ہے۔
نئی قیمتیں یکم جولائی 2024 سے لاگو ہوں گی اور ان کا اطلاق مختلف روٹس پر ہوگا جن میں ایم1 اسلام آباد پشاور، ایم3 لاہور عبدالحکیم، ایم 4 پنڈی بھٹیاں فیصل آباد، ملتان، موٹروے ایم5 ملتان سکھر، ایم14 ڈی آئی خان، حویلیاں، مانسہرہ ایکسپریس وےاور ای 35 حسین آباد، حسن ابدال شامل ہیں۔
اس حوالے سے ذرائع کا کہنا ہے کہ نیشنل ہائی ویز پر کار کا ٹول ٹیکس 30سے بڑھا کر 40روپے کردیا گیا ہے۔
ذرائع کے مطابق ویگن کا ٹول ٹیکس50سے70، بس کا100سے130روپے جبکہ ایم ون پشاور اسلام آباد موٹر وے پر کارکا ٹول ٹیکس240سے350روپے کردیا گیا۔
ایم ون پشاور اسلام آباد موٹر وے پر بس کا ٹول ٹیکس790سے1000روپے مقرر اور ایم تھری لاہور عبدالحکیم موٹر وے پر کار کا ٹول ٹیکس390سے بڑھا کر 500روپے کردیا گیا ہے۔
اس کے علاوہ ایم تھری لاہور عبدالحکیم موٹر وے پر بس کا ٹول ٹیکس1200سے بڑھا کر1600روپے مقرر جبکہ ایم 4پنڈی بھٹیاں، فیصل آباد، ملتان موٹر وے پر کار کا ٹول ٹیکس510سے بڑھا کر 650روپے کردیا گیا۔
ذرائع کے مطابق ایم 4پنڈی بھٹیاں، فیصل آباد، ملتان موٹر وے پر بس کا ٹول ٹیکس 1560 سے بڑھا کر 2ہزار روپے اور ایم14ہکلہ ڈی آئی خان موٹر وے پر کار کا ٹول ٹیکس440سے بڑھا کر550روپے مقرر کیا گیا ہے۔
ایم14ہکلہ ڈی آئی خان موٹر وے پر بس کا ٹول ٹیکس 1440 سے بڑھا کر 1900روپے مقرر کیا گیا ہے، نیشنل ہائی وے اتھارٹی کا کہنا ہے کہ تمام ٹیکسز میں اضافہ ہر 3سال کے بعد کیا جاتا ہے، ان ٹیکسز کا اطلاق یکم جولائی سے ہوگا۔
