مدھیہ پردیش : بھارت کی وسطی ریاست مدھیہ پردیش میں بی جے پی رہنما پرویش شکلا کی فٹ پاتھ پر بیٹھے قبائلی ریڑھی بان پیشاب کرنے کی غلیظ حرکت کی ویڈیو سوشل میڈیا پر وائرل ہوگئی۔
تفصیلات کے مطابق انتہا پسند ہندوؤں کی جانب سے مسلمانوں پر حملوں کے قصے تو عام ہیں تاہم اب اونچی ذات کے ہندوؤں نے نچلی ذات کے لوگوں سے غیر انسانی سلوک شروع کردیا۔
مودی راج میں انسانیت کی تذلیل کا ایک اور شرمناک واقعہ سامنے آیا ، مدھیہ پردیش میں حکمران جماعت بی جے پی کے رہنما پرویش شکلا نے فٹ پاتھ پر بیٹھے قبائلی ریڑھی بان پرپیشاب کردیا، واقعے کی ویڈیو وائرل ہوگئی۔
سوشل میڈیا پر وائرل ہونیوالی ویڈیو پرغم و غصے کا اظہار کیا جارہا ہے، کانگریس کا کہنا ہے کہ ملزم حکمراں بھارتیہ جنتا پارٹی سے وابستہ ہے، لیکن بی جے پی نے اس کی تردید کی ہے تاہم سوشل میڈیا صارفین نے پرویش شکلا کےبی جے پی سے منسلک ہونے کے ثبوت پیش کردیئے۔
بھارتی ریاست مدھیہ پردیش میں پولیس نے ملزم کو گرفتار کرکے مقدمہ درج کرلیا ہے۔
کانگریس کے سابق وزیراعلیٰ کمل ناتھ کا کہنا ہے واقعے نے ریاست کا سر شرم سے جھکادیا جبکہ سماج وادی پارٹی کے رہنما نے ٹویٹ کیا لو جہاد کے نام پر نفرت کا بیج بونے والو ذرا اپنے آپ کو دیکھو کہاں کھڑے ہو اور کس قدر نیچے گِرو گے؟
غیر انسانی سلوک پر مدھیہ پردیش میں مشتعل افراد نے ملزم پرویش شکلا کا گھر گرادیا ہے۔
