The news is by your side.

Advertisement

اسلام آباد: رکن اسمبلی کے شوہر کا ایڈیشنل سیشن جج پر بہیمانہ تشدد

اسلام آباد: وفاقی دارالحکومت میں واقع شاہراہ دستور پر  رکن صوبائی اسمبلی عابدہ راجا کے خاوند نے ایڈیشنل سیشن جج ملک جہانگیر کو تشدد کا نشانہ بنا ڈالا۔

نمائندہ اے آر وائی نیوز کے مطابق دفترخارجہ کے قریب واقع پیٹرول پمپ پر دو گاڑیوں میں بیٹھے افراد میں پہلے جانے کے معاملے پر تکرار ہوئی جو ہاتھا پائی میں تبدیل ہوگئی۔

ایک گاڑی کے ڈرائیور کی شناخت چوہدری خرم کے نام سے ہوئی جو عابدہ راجا کے شوہر ہیں، جھگڑے کے وقت تحریک انصاف کی رکن صوبائی اسمبلی بھی گاڑی میں موجود تھی جبکہ دوسری گاڑی میں ایڈیشنل سیشن جج ملک جہانگیر موجود تھے۔

دونوں گاڑیاں جب دفتر خارجہ کے آفس کے قریب پہنچی تو عابدہ راجا کے شوہر چوہدری خرم پیٹرول پمپ  پرگاڑی سے اتر کر ایڈیشنل سیشن جج کی کار  کے قریب گئے اور اُن کو بہیمانہ تشدد کا نشانہ بنانا شروع کردیا۔ عابدہ راجا کے شوہر نے ایڈیشنل سیشن جج کو بہیمانہ تشدد کا نشانہ بنایا جس کی وجہ سے جہانگیر اعوان کی ٹانگ میں فریکچر بھی ہوا۔

زخمی ہونے والے جج کو پولی کلینک اسپتال منتقل کردیا گیا۔ واقعے کی سی سی ٹی وی فوٹیج میں حقیقت بھی سامنے آگئی ہے۔

دوسری جانب ایم پی اے عابدہ راجا نے اپنا مؤقف بیان کرتے ہوئے کہا کہ ’پیٹرول پمپ پہنچنے کے بعد ہم پر فائرنگ کی گئی، فائرنگ کرنے والے شخص کے بارے میں ہمیں کوئی علم نہیں تھا اس لیے ہم نے فوراً پولیس کو مدد کے لیے طلب کیا، پولیس مذکورہ شخص اور شوہر کو تھانے لے کر گئی‘۔

ایڈیشنل سیشن جج کا کہنا تھا کہ ’مجھے معلوم ہی نہیں تھا کہ مجھ پر کون اور کیوں تشدد کررہا ہے، میں گاڑی میں پیٹرول ڈلوا رہا تھا کہ اچانک سے ایک شخص آیا اور حملہ کردیا، حملے کے باعث میرے چہرے پر بھی چوٹیں آئیں ہیں۔

Comments

یہ بھی پڑھیں