کراچی: رینجرز اور پولیس نے انٹیلی جنس معلومات کی بنا پر کورنگی مہران ٹاؤن میں بڑی کارروائی کرتے ہوئے ایم کیو ایم لندن کا خطرناک دہشت گرد جنید بلڈاگ گرفتار کر لیا۔
ترجمان رینجرز کے مطابق ملزم جنید حمید عرف بلڈاگ 36 سے زائد افراد کی ٹارگٹ کلنگ اور درجنوں افراد کو زخمی کرنے میں ملوث ہے، ذرائع کا کہنا ہے کہ گرفتار ملزم نے کراچی آپریشن کے اہم کردار ایس پی شاہ محمد شاہ کو بھی ہدف بنا کر قتل کیا۔
گرفتار دہشت گرد جنید حمید عرف جنید بلڈاگ پولیس کو انتہائی مطوب تھا، ملزم ایم کیو ایم لندن کے دہشت گرد رئیس مما کا قریبی ساتھی اور کورنگی میں ٹارگٹ کلنگ گروپ کا سرغنہ بھی رہا ہے۔
گرفتار دہشت گرد نے 11 اگست 2011 میں کورنگی چکرا گوٹھ میں پولیس بس پر حملے میں ملوث ہونے کا بھی اعتراف کیا، جس میں 4 پولیس اہل کار شہید جب کہ 26 اہل کار زخمی ہو گئے تھے۔
ملزم نے ساتھیوں سمیت کراچی آپریشن کے اہم کردار شاہ محمد شاہ کو ڈاکٹر دلشاد سمیت ہدف بنا کر شہید کیا تھا، ملزم 2013 کے بعد سے بلوچستان کے علاقے جھل مگسی میں روپوش تھا اورپولیس کو قتل، اقدام ِ قتل، جلاؤ گھیراؤ اور دہشت گردی کے متعدد مقدمات میں مطلوب تھا۔
ترجمان رینجرز کے مطابق گرفتار ملزم کو مزید کارروائی کے لیے پولیس کے حوالے کر دیا گیا ہے۔
