ایم کیو ایم کے سابق رہنما رضا ہارون اور انیس ایڈووکیٹ نے پیپلزپارٹی میں شمولیت اختیار کرلی۔
اے آر وائی نیوز کے مطابق بلاول ہاؤس میں آصف علی زرداری سے ملاقات کے بعد رضا ہارون اور انیس ایڈووکیٹ نے پیپلزپارٹی میں باقاعدہ شمولیت اختیار کی۔
آصف علی زرداری نے انیس ایڈووکیٹ اور رضا ہارون کو پی پی پی میں شمولیت پر خوش آمدید کہا، اس موقع پررہنماؤں کے درمیان شہرِقائد کی ترقی، خوش حالی، قیام امن اور مفاہمتی ماحول کے فروغ کے حوالے سے چارٹر آف کراچی پر بھی تبادلہ خیال ہوا۔
سابق صدر نے کہا کہ پیپلزپارٹی کراچی والوں کی جماعت ہے کراچی والوں کی منتخب جماعت پہلی بار وفاق پر حکومت کرے گی۔
آصف زرداری نے کہا کہ چاہتے ہیں کہ پوری دنیا سے سرمایہ کاری آئے اور کراچی دبئی کی طرز پر معاشی حب بنے۔
واضح رہے کہ رضا ہارون اور انیس خان ایڈووکیٹ نے 2016 میں ایم کیوایم چھوڑ کر پاک سرزمین پارٹی میں شمولیت اختیار کی تھی ، 2018 کے انتخابات کے بعد سے دونوں سیاست میں سرگرم نہیں تھے۔
