The news is by your side.

Advertisement

پہلی مسلم ویب سیریز ’مس مارول‘ میں تین پاکستانی گانے شامل

نیو یارک: مداحوں کا انتظار ختم، مارول سنیمیٹک اسٹوڈیوز اور ڈزنی پلس کی پہلی مسلم اور پاکستانی ویب سیریز ’مس مارول‘ ریلیز ہوگئی ہے جس میں تین پاکستانی گانے بھی شامل کیے گئے ہیں۔

تفصیلات کے مطابق ویب سیریز ’مس مارول‘ کے پہلے سیزن کی پہلی قسط 8 جون کو دنیا بھر میں ’ڈزنی پلس‘ پر ریلیز کردی گئی ہے، تاہم پاکستان میں مداحوں کو ابھی مزید انتظار کرنا پڑے گا کیونکہ اسے فی الحال پاکستان میں ریلیز نہیں کیا گیا ہے۔ رپورٹ کے مطابق اسے پاکستان میں بھی جلد ہی سینما گھروں میں نمائش کیلئے پیش کیے جانے کا امکان ہے۔

’مس مارول‘ اب تک کی امریکا یا ہالی وڈ کی وہ پہلی ویب سیریز ہے، جس میں پاکستانی کرداروں کو مثبت روپ میں دکھایا جا رہا ہے، ویب سیریز میں کی کہانی ’کمالہ خان‘ نامی پاکستانی نژاد نیوجرسی کی لڑکی کے گرد گھومتی ہے جو کہ منفرد صلاحیتوں کی مالک ہوتی ہے، یہ پہلا موقع ہے کہ کسی بھی ویب سیریز کی کہانی نہ صرف پاکستانی بلکہ مسلم لڑکی کے گرد گھومے گی۔

ویب سیریز میں کمالہ خان کا کردار پاکستانی نژاد امریکی اداکارہ ایمان ویلانی نے ادا کیا ہے، ویب سیریز میں دیگر پاکستانی اداکار  نمرہ بچہ، مہوش حیات، فواد خان اور ثمینہ احمد بھی شامل ہیں۔

یہ بھی پڑھیں: ویب سیریز ’مس مارول‘ میں کوک اسٹوڈیو کا مشہور گانا شامل

’مس مارول‘ کے پہلے سیزن میں 6 قسطیں ہیں اور اس کی پہلی قسط 8 جون کو ریلیز ہوئی، ویب سیریز میں کوک اسٹوڈیو کا گانا ‘پیچھے ہٹ’ شامل کیے جانے کی تصدیق کی گئی تھی، تاہم اب کہا جارہا ہے کہ پہلی قسط میں 15 گانوں کو شامل کیا ہے جن میں تین پاکستانی گانے بھی شامل ہیں۔

پہلی قسط میں شامل پاکستانی گانوں میں شہرہ آفاق احمد رشدی کا گانا ’کوکو کورینا‘، مقبول اداکارہ ناہید اختر کا ’سوہنیے آئی لو یو‘ اور ’کوک اسٹوڈیو سیزن 14‘ کے ’کنا یاری‘ سے شہرت حاصل کرنے والی بلوچ گلوکارہ ایوا بی کا گانا ’روزی‘ بھی شامل کیا گیا ہے۔

ایوا بی نے مس مارول میں اپنے گانے کی شمولیت تصدیق کی ہے، انہوں نے اپنے انسٹاگرام اکاؤنٹ پر مس مارول میں شامل اپنے گانے کی ویڈیو شیئر کرتے ہوئے اسے اپنے اور ملک کے لیے فخر قرار دیا ہے۔

Comments

یہ بھی پڑھیں