اسلام آباد : گزشتہ شب وفاقی وزیر مذہبی امور مفتی عبدالشکور کے ٹریفک حادثہ میں جاں بحق ہونے کا مقدمہ درج کرلیا گیا۔
حاجی قدرت اللہ کی مدعیت میں واقعے کا مقدمہ تھانہ سیکریٹریٹ میں درج کیا گیا ہے، انہوں نے بتایا کہ مفتی عبدالشکور افطاری سے پہلے میرے گھر آئے، 8بج کر 22منٹ پر مفتی عبدالشکور گھر سے پارلیمنٹ لاجز کیلئے نکلے۔
مقدمہ کے متن کے مطابق رات10بجے میرے ملازم کو سرکاری ڈرائیور نے حادثے سے متعلق آگاہ کیا، مولانا اپنی سرکاری گاڑی کو خود چلا کر لے جارہے تھے۔
ویگو ڈالے کے ڈرائیور نے غفلت، تیز رفتاری سے گاڑی چلاتے ہوئے ہٹ کیا، مفتی عبدالشکور کی موقع پر ہی موت واقع ہوگئی، واقعہ حساس نوعیت کا ہے ہر پہلو سے انکوائری اور کارروائی کی جائے۔
اسی حوالے سے آئی جی اسلام آباد اکبر ناصر نے میڈیا سے گفتگو میں کہا کہ مولانا کی گاڑی کو دوسری طرف سے آنے والی گاڑی نے ٹکر ماری، مولانا عبدالشکور کو سر پر شدید چوٹ لگی اور وہ موقع پر ہی جاں بحق ہوگئےجبکہ گاڑی میں سوار پانچ افراد کو گرفتار کرلیا گیا ہے۔
