کراچی: جامعہ بنوریہ کراچی کے مہتتم اور معروف عالم دین مفتی نعیم انتقال کرگئے۔
اے آر وائی نیوز کی رپورٹ کے مطابق جامعہ بنوریہ کراچی کے مفتی نعیم کراچی میں انتقال کرگئے، مفتی نعیم دل کے عارضے میں مبتلا تھے۔
مفتی نعمان نے انتقال کی تصدیق کرتے ہوئے بتایا کہ انہیں طبیعت بگڑنے پر اسپتال لے جایا جارہا تھا والد کا انتقال راستے میں ہوا، و ہ دل کے عارضے میں مبتلا تھے۔
نمائندہ اے آر وائی نیوز کے مطابق ان کے اہلخانہ کا کہنا ہے کہ مفتی نعیم کی نماز جنازہ کل بعد نماز عصر ادا کی جائے گی.۔
واضح رہے کہ کرونا کے پیش نظر مفتی نعیم نے بھی بیان دیا تھا اور عوام سے ایس او پیز پر عملدرآمد کرنے کی ہدایت کی تھی، انہوں نے پلازمہ کی خریدوفروخت کو بھی حرام قرار دیا تھا۔
خیال رہے کہ رواں سال مئی میں سوشل میڈیا پر مفتی نعیم کے کرونا میں مبتلا ہونے کی خبریں سوشل میڈیا پر وائرل ہوئی تھیں تاہم ان کے ترجمان نے تردید کردی تھی۔
جامعہ بنوریہ میڈیا نے اپنے جاری بیان میں کہا تھا کہ مفتی نعیم دل کے عارضہ کے باعث اسپتال منتقل ہوئے تھے تاہم اب صحت یاب ہوکر گھر منتقل ہوگئے ہیں۔
جامعہ بنوریہ کی جانب سے سوشل میڈیا پر چلنے والی بے بنیاد خبروں خی تردید کی گئی تھی۔
گورنر سندھ عمران اسماعیل نے مفتی نعیم کے انتقال پر افسوس کا اظہار کرتے ہوئے کہا کہ ان کی پوری زندگی اسلام کی درس و تدریس میں گزری، مفتی نعیم نے جامعہ بنوریہ کو عالمی معیار کی درسگاہ بنایا۔
پارلیمانی سیکریٹری برائےمذہبی امورآفتاب جہانگیراور جے یو آئی رہنما علامہ راشد سومرو، اسلم غوری نے مفتی نعیم کےانتقال پر افسوس کا اظہار کرتے ہوئے ان کے درجات کی بلندی کے لیے دعا کی۔
