گلگت بلتستان سے تعلق رکھنے والے کم عمر یوٹیوبر محمد شیراز نے ایک بار پھر اے آر وائی ڈیجیٹل کی خصوصی نشریات شان رمضان میں شرکت کرکے ناظرین کو خوشگوار حیرت میں مبتلا کردیا۔
اے آر وائی ڈیجیٹل کی ماہ رمضان میں پیش کی جانے والی نشریات شان رمضان دنیا بھر میں پسند کی جاتی ہے جس کے ایک سیگمنٹ ’’ننھے مہمان‘‘ میں بچوں سے دلچسپ گفتگو کی جاتی ہے اور ان کی معصومانہ شرارتوں سے ناظرین بھی محضوظ ہوتے ہیں۔
کم عمر وی لاگر محمد شیراز رمضان ٹرانسمیشن کے کچھ پروگراموں میں شرکت کرکے واپس اپنے گاؤں گلگت بلتستان چلے گئے ہیں تاہم گزشتہ روز پروگرام کے دوران ان سے ویڈیو کال پر رابطہ کیا گیا۔
پروگرام کے میزبان وسیم بادامی نے ان سے حال احوال جاننے کے بعد مختلف سوالات بھی کیے۔ جس کے جواب میں شیراز نے وسیم بادامی کو پروگرام سے چھٹی لے کر گلگت آنے کی دعوت دیتے ہوئے کہا کہ مجھے شان رمضان بہت یاد آرہا ہے۔
اس موقع پر پروگرام کے میزبان نے ان سے استاد نصرت فتح علی خان کا ایک ملی نغمہ سنانے کی فرمائش کی جسے شیراز نے اپنے مخصوص انداز اور لہجے میں گا کر سنایا۔
واضح رہے کہ محمد شیراز کا تعلق سیاچن کے نواحی گاؤں ‘غورسے’ سے ہے اور وہ اپنی ہی طرح پیاری سی چھوٹی بہن مسکان کے ساتھ غورسے میں گزرنے والی روزمرہ زندگی وی لاگز کے ذریعے دکھاتے ہیں۔