ملتان : قومی کرکٹ ٹیم کے بیٹنگ کوچ محمد یوسف نے کہا ہے کہ ملتان ٹیسٹ ففٹی ففٹی نظرآرہا ہے، انگلینڈ کی ٹیم پریشرمیں آگئی تھی۔
ان خیالات کا اظہار انہوں نے ملتان میں پریس کانفرنس سے خطاب کرتے ہوئے کیا، انہوں نے کہا کہ سعود اور امام کی پاٹنر شپ سے انگلینڈ ٹیم پر پریشر آگیا تھا۔
انہوں نے کہا کہ ہر سیشن میں میچ کی صورتحال بدل رہا ہے یہ ہی ٹیسٹ کرکٹ کی خوبصورتی ہے، امام آؤٹ نہیں ہوتا تو معاملہ ففٹی ففٹی نہیں ہوتا۔
محمد یوسف کا کہنا تھا کہ پچ ایسی ہی ہونی چاہیے جس میں ٹیسٹ کا کوئی نتیجہ آئے، رضوان اور بابر کے آگے پیچھے آؤٹ ہونے سےمیچ ہاتھ سے نکل گیا تھا۔ امام اور سعود کی پاٹنر شپ ہمیں دوبارہ میچ میں واپس لے کر آئی۔
صحافی کی جانب سے محمد رضوان کی مسلسل خراب پرفارمنس کے سوال پر محمد یوسف کچھ دیر خاموش رہے پھر کہا کہ محمد رضوان میری ڈومین میں نہیں آتے میں اس پر کچھ نہیں بول سکتا۔
ان کا کہنا تھا کہ میچ میں وائٹ بال زیادہ ہورہی ہے شاید اس وجہ سے لمبی اننگز نہیں کھیلی جارہی، وائٹ بال کی طرح ریڈبال میں بھی تیز کھیلنا چاہتے ہیں۔
