اسلام آباد : جےیوآئی (ف) سربراہ مولانا فضل الرحمان کا کہنا ہے کہ جو لوگ عدم استحکام پیدا کرنا چاہتے ہیں ان سے سودے بازی نہیں ہو گی۔
تفصیلات کے مطابق پی ڈی ایم کے سربراہ مولانا فضل الرحمان نے ویڈیو بیان میں کہا ہے کہ ملک کومعاشی وسیاسی استحکام کی ضرورت ہے، جو لوگ عدم استحکام پیدا کرنا چاہتے ہیں ان سے سودے بازی نہیں ہو گی۔
مولانا فضل الرحمان کا کہنا تھا کہ 2018 میں دھاندلی کے نتیجے میں نا اہل حکمران کو مسلط کیا گیا اور آئی ایم ایف کے ساتھ معاہدے کر کے ملک کو گروی رکھ دیا گیا۔
جے یوآئی (ف)سربراہ نے کہا کہ اسٹیٹ بینک کو آئی ایم ایف کے حوالے کر دیا گیا، آج گورنراسٹیٹ بنک وزیر اعظم،کابینہ اور پارلیمنٹ کو جوابدہ نہیں۔
ان کا کہنا تھا کہ چین کے اعتماد کوبھی متاثر کرنے کی کوشش کی گئی، وزیر اعظم چین میں ہیں اور یہ لوگ اسلام آباد میں داخل ہونا چاہتے ہیں۔
مولانا فضل الرحمان نے کہا کہ ملک کے ناموس پر کوئی سمجھوتہ نہیں کیا جائے گا،ان سے کوئی مذاکرات اور ریلیف کی حکومت کوکوئی اجازت نہیں ہو گی۔
