برطانیہ میں ایک ماں کے ہاتھوں شدید طور پر زخمی ہونے والی معصوم بیٹی نے دم توڑ دیا۔
برطانوی کاؤنٹی ویسٹ مڈلینڈز کے ایک قصبے راؤلی ریجس میں ایک 10 سالہ معصوم لڑکی شے کانگ کو پیر کی رات شدید زخمی حالت میں پایا گیا تھا، جسے بچایا نہیں جا سکا۔
مقامی پولیس نے شے کانگ کی 33 سالہ ماں جسکرت کور عرف جیسمن کانگ پر بیٹی کے قتل کا الزام لگا دیا ہے، شے کانگ نے رابن کلوز میں واقع اپنے گھر میں زخموں کے باعث دم توڑا تھا، جس پر اس کی ماں پر پولیس نے قتل کا الزام عائد کیا اور آج وہ وولور ہیمپٹن کے مجسٹریٹ کے سامنے پیش ہوں گی۔
پولیس نے بیان جاری کیا کہ وہ شے کے خاندان اور اس کے دوستوں کے ساتھ اظہار تعزیت کرتے ہیں، شے کانگ کی المناک موت نے ان پر یقیناً گہرا اثر ڈالا ہے۔ پولیس نے کہا ’’ہم درخواست کرتے ہیں کہ جب تک ہماری انکوائری جاری ہے انھیں یہ غم منانے دیا جائے۔‘‘
