کراچی سمیت اندرون سندھ بلدیاتی انتخابات کے دوسرے مرحلے کی پولنگ کے بعد غیر سرکاری اور غیرحتمی نتائج کا سلسلہ تاحال جاری ہے۔
پولنگ کا وقت ختم ہوئے تقریباً 8 گھنٹے سے زائد کا وقت گزرچکا ہے، تاہم ووٹوں کی گنتی اور غیرسرکاری غیر حتمی نتائج کی آمد کا سلسلہ تا دم تحریر جاری ہے۔
اس صورتحال کے سبب بلدیاتی نتائج آنے میں غیرمعمولی تاخیر کا سامنا ہے، موجودہ صورتحال پر جماعت اسلامی اور پاکستان تحریک انصاف کی جانب سے مداخلت کے الزامات عائد کیے جا رہے ہیں۔
کراچی اور حیدرآباد سمیت16 اضلاع میں پولنگ ہوئی، کہیں ترازو کا پلڑا بھاری رہا تو کہیں تیر نے بازی ماری، کہیں بلے کی یلغار نظر آئی، کراچی میں جماعت اسلامی، پی ٹی آئی اور پیپلزپارٹی میں سخت مقابلہ دیکھنے میں آیا، مجموعی طورپر ٹرن آؤٹ انتہائی کم رہا۔
غیرحتمی اور غیرسرکاری نتیجے کے مطابق ضلع وسطی اور شرقی میں جماعت اسلامی کے زیادہ امیدوار کامیاب ہوئے جبکہ ضلع ملیر اور جنوبی میں تیر چل گیا، لیاری میں جیالوں نے میدان مارلیا اور کیماڑی میں تیر اور بلے میں کانٹے کا مقابلہ رہا۔
اس کے علاوہ حیدرآباد، بدین اور سندھ کے دیگر اضلاع میں پیپلزپارٹی کو واضح طور پر برتری حاصل ہے ، اے آر وائی نیوز نے سب سے پہلے نتیجہ دینے کی روایت برقرار رکھی۔
قبل ازیں سندھ میں بلدیاتی انتخابات کے لیے ووٹنگ کا عمل مجموعی طور پر شفاف اور پرامن طریقے سے مکمل ہوا البتہ چند مقامات سے بدامنی اور انتخابی بے ضابطگیوں کی اطلاعات بھی موصول ہوئی ہیں۔
صبح 8 بجے شروع ہونے والی پولنگ کا عمل شام 5 بجے تک مسلسل جاری رہا جبکہ الیکشن کمیشن نے واضح کہا تھا کہ پولنگ کے وقت میں اضافہ نہیں کیا جائے گا اور 5 بجے کے بعد صرف پولنگ اسٹیشنز کے اندر موجود شہریوں کو ہی حق رائے دہی استعمال کرنے کی اجازت ہوگی۔
