کراچی : سندھ کے وزیرخزانہ مراد علی شاہ نے کہا ہے کہ پیپلزپارٹی قومی اداروں کی نجکاری کے حق میں نہیں، نجکاری کے دوران پاکستان اسٹیل پر پہلاحق سندھ حکومت کا ہے،۔
اسٹیل ملز کی نجکاری کی صورت میں زمین سندھ حکومت کو واپس مل جائے گی۔ ان خیالات کا اظہار انہوں نے کراچی میں میڈیا سے بات چیت کرتے ہوئے کیا۔
مراد علی شاہ نے کہا کہ پیپلزپارٹی صوبے میں بلدیاتی انتخابات کے لئے تیار ہے۔ ان کا کہناتھا کہ وزارت پانی وبجلی لوگوں کو بجلی مہیا کرنے میں ناکام رہی ہے،صارفین کو زیادہ بل بھیجے جارہے ہیں کے الیکٹرک اور وزارت پانی وبجلی ہوش کے ناخن لیں۔
انہوں نے کہا کہ میں نے آئین کے آرٹیکل 158 پرعمل درآمد کی بات کی تھی جس میں لکھاہے کہ جس صوبے میں گیس پیداہوتی ہواسی صوبےکوترجیحی بنیادوں پر گیس بھی فراہم کی جائے گی،اگر اس پر غداری کامقدمہ بنتا ہے تو مجھ پر مقدمہ بنایا جائے۔
