اسلام آباد : وفاقی وزیر مواصلات مراد سعید نے کہا ہے کہ ہائی ویز اور موٹر ویز پر جرمانے کااطلاق روک دیا گیا ہے، پالیسی پر عمل درآمد سب کو اعتماد میں لینے کے بعد کیا جائے گا۔
تفصیلات کے مطابق حکومت نے موٹر ویز پر سفر کرنے والوں کو بڑ ی خوشخبر سنادی، ہائی ویز اور موٹرویز پر اضافی جرمانے کا اطلاق روک دیا گیا ہے۔
اس حوالے سے وفاقی وزیر مواصلات و پوسٹل سروسز مراد سعید نے کہا ہے کہ مذکورہ پالیسی پر عمل درآمد سب کو اعتماد میں لے کر کیا جائے گا، روڈ سیفٹی پالیسی کا مقصد عوام کی جان و مال کا تحفظ ہے۔
یہ بات انہوں نے قومی اسمبلی میں اظہار خیال کرتے ہوئے کہی۔ انہوں نے کہا کہ موٹر ویز اور ہائی ویز پر بھاری جرمانے آج سے نافذ العمل ہونا تھے لیکن مختلف حلقوں کی طرف سے احتجاج کے باعث ابھی عمل درآمد نہیں کیا گیا۔
جرمانوں پر ابھی غور جاری ہے، بھاری جرمانے ٹریفک حادثات اور انسانی جانوں کے ضیاع سے بچاؤ کے لیے کیے گئے۔
