اسلام آباد : وفاقی وزیر مواصلات مراد سعید نے سابق وزیراعظم اور وزیراعلیٰ کے غیر قانونی اخراجات کی رپورٹ پبلک کرنے کے لیے خط لکھ دیا اور کہا عوامی مفاد کی خاطر پیش رفت سے آگاہ کیا جائے۔
تفصیلات کے مطابق وفاقی وزیر مواصلات مراد سعید نے چیئرمین قرضہ جات کمیشن کو رپورٹ پبلک کرنے کے لیے خط لکھ دیا ، جس میں کہا ہے کہ 2دسمبر 2019 کو سابق وزیراعظم اور وزیراعلیٰ کے غیر قانونی اخراجات کے ثبوت دیے، نواز شریف کی نا اہلی کے بعد ذاتی گھر رائیونڈ کووزیراعلیٰ ہاؤس قراردے دیا گیا اور رائیونڈ کو وزیراعلیٰ ہاؤس قرار دے کر قوم کے کروڑوں روپے لگا دیے گئے۔
خط میں کہا گیا ہے کہ شہباز شریف نے 4 ذاتی گھر کیمپ آفس قراردے کر کے قوم کے پیسے اڑائے، جاتی امرا پر سیکیورٹی اور فینسنگ وغیرہ کرکے قومی خزانے سے کراکےعوام پر بوجھ ڈالا گیا ، زرداری اور گیلانی نے 3،3ذاتی گھر کیمپ آفسسز قرار دے کرعوامی خزانے کا پیسہ اڑایا۔
مراد سعید کا کہنا تھا کہ آصف زرداری نے بیرون ملک 59 نجی دورے بھی قومی خزانے سے کیے، نواز شریف نے قومی خزانے سے 25 نجی دورے کیے اور شہبازشریف نے 43کروڑ کا وزیراعظم کا طیارہ ،ڈیڑھ ارب کا ہیلی کاپٹر استعمال کیا۔
وفاقی وزیر نے کہا کہ شہباز شریف نےنجی دورے قومی خزانے سے کیے اور غیر قانونی طور پر وزیراعظم کا طیارہ 556 دفعہ استعمال کیا جبکہ صدرنہ ہوتے ہوئے آصف زرداری کی سیکیورٹی پر 5 سال میں 163کروڑخرچ کیے گئے۔
خط کے مطابق جاتی امراکی سیکیورٹی پر 214 کروڑ خرچ کیے گئے اور نواز شریف نے قومی خزانے سے کیمپ آفس اور دوروں پر431 کروڑ83 لاکھ 92 ہزار خرچ کیے۔
مراد سعید نے بتایا کہ شہباز شریف نے کل 872 کروڑ سے زائد اڑا دیے، زرداری نے قومی خزانے سے 316 کروڑ 41 لاکھ اڑا دیے، دستاویزات کمیشن کو مہیا کیے گئے ،عوامی مفاد کی خاطر پیش رفت سے آگاہ کیا جائے۔
خط میں کہا کہ قوم پہلے ہی ان کی لوٹ اور شاہ خرچیوں کی وجہ سے مشکل میں ہے ، لہذا یہ پیسہ واپس قومی خزانے میں جمع کرا کر عوام کے ریلیف کے لیے استعمال کیا جائے۔
