اسلام آباد: وفاقی وزیر مواصلات مراد سعید کا کہنا ہے کہ سندھ میں سوال پوچھنے پر صحافیوں کو موت کے گھاٹ اتار دیا جاتا ہے۔
تفصیلات کے مطابق وفاقی وزیر مراد سعید نے چیئرمین پیپلزپارٹی بلاول بھٹو کی پریس کانفرنس پر ردعمل دیتے ہوئے کہا کہ فرزند زرداری کی گفتگو سے سیاست پر ان کی ترجیحات کا پتہ چلتا ہے۔
مراد سعید کا کہنا تھا کہ سندھ کا حال دیکھیں تو حادثاتی چیئرمین کی سیاست کے مستقبل کا اندازہ لگانا مشکل نہیں ہے، سندھ میں سوال پوچھنے پر صحافیوں کو موت کے گھاٹ اتار دیا جاتا ہے۔
وفاقی وزیر کا کہنا تھا کہ فرزند زرداری کے منہ سے بھارت کے خلاف ایک لفظ نہیں نکلتا، بھارتی مظالم پر مذمت کا ایک لفظ تک سنائی نہیں دیتا۔
انہوں نے کہا کہ بلاول کو وزیراعظم عمران خان کا کشمیر کا مقدمہ لڑنا، مودی کو بے نقاب کرنا برا لگا، بلاول کو اتنا برا لگا کہ خود ہی اعتراف کر کے ان کا ترجمان بن گیا۔
مراد سعید کا کہنا تھا کہ فرزند زرداری نے جعلی اکاؤنٹس،کرپشن کے پیسے کا جواب نہیں دیا، تھر میں بھوک سے اموات، اسپتالوں کی حالت زار کا جواب نہیں ملا۔ وفاقی وزیر کا مزید کہنا تھا کہ سندھ میں کتوں کے کاٹنے کے بڑھتے واقعات پر تشویش ہے، لاڑکانہ میں کتوں کے راج پر گہری تشویش ہے۔
