لندن : ٹیسٹ اور ون ڈے انٹرنیشنل کےکامیاب ترین باؤلر متیاہ مرلی دھرن کو آئی سی ہال آف فیم میں شامل کر لیا گیا ہے۔
تفصیلات کےمطابق سری لنکا اور انڈیا کے درمیان آئی سی سی چیمپیئنز ٹرافی کے میچ کی اننگز بریک کے دوران لندن میں ایک تقریب میں مرلی دھرن کو یہ اعزاز دیا گیا۔
مرلی دھرن کے ساتھ ساتھ آرتھر مورس، جیارج لومین اور کیرن رولٹن کو بھی اس اعزاز سے نوازا گیا۔
خیال رہےکہ مرلی دھرن یہ اعزاز حاصل کرنے والے سری لنکا کے پہلے اور دنیا کے 83ویں کھلاڑی ہیں، انہیں آئی سی سی کے چیف ایگزیکٹو آفیسر ڈیو رچرڈسن نے اعزازی کیپ دی۔
Watch the moment that Muttiah Muralitharan was inducted into the ICC Hall of Fame.
Congratulations Murali! pic.twitter.com/cFJrolaW98
— ICC (@ICC) June 8, 2017
مرلی دھرن ٹیسٹ کرکٹ کی تاریخ کے وہ واحد گیند باز ہیں جنھوں نے 800 وکٹیں جبکہ ون ڈے کرکٹ میں 534 وکٹیں لیں۔
اس موقع پر مرلی دھرن کا کہنا تھا کہ یہ میرے لیے انتہائی فخر اور اعزاز کی بات ہے، خاص کر آئی سی سی کی جانب سے جو کہ کسی بھی کرکٹر کی سب سے بڑی خواہش ہو سکتی ہے۔
واضح رہےکہ مرلی دھرن نے 1993 سے لے کر 2011 تک کے دوران سری لنکا کی جانب سے 133 ٹیسٹ اور 350 ایک روزہ میچ کھیلے۔
