راولپنڈی : پولیس نے سینئر سیشن جج آزاد کشمیر کے قتل کا مقدمہ درج کرلیا، مقدمے میں ڈکیتی اور قتل کی دفعات شامل کی گئی ہیں۔
تفصیلات کے مطابق راولپنڈی کے تھانہ روات کی حدود میں گزشتہ رات سینئر سیشن جج سردار امجد اسحاق کے گھر میں ڈکیتی کے دوران قتل کا واقعہ پیش آیا تھا۔
پولیس نے مقتول جج کے قتل کا مقدمہ ان کے بھائی کی مدعیت میں تھانہ روا ت میں درج کرلیا ہے، مقدمے میں ڈکیتی اور قتل کی دفعات شامل کی گئی ہیں۔
مقدمے کے متن میں لکھا گیا ہے کہ گزشتہ رات ڈھائی بجے مسلح ڈاکو تھانہ روات کے علاقہ فیز 8 کے ایک گھر میں داخل ہوئے، ملزمان نے جج کے بھتیجے کو پکڑا تو ان کے بھائی نے چھڑانے کی کوشش کی۔
اسی دوران ڈاکوؤں نے سیدھی فائرنگ کردی، ملزمان کی فائرنگ سے سینئر سیشن جج آزاد کشمیر سردار امجد اسحاق جاں بحق ہوئے۔
یاد رہے کہ گزشتہ رات پولیس کی جانب سے جاری بیان کے مطابق واقعہ کے بعد آر پی او راولپنڈی سید خرم علی نے نوٹس لے کر ملزمان کی فوری گرفتاری کا حکم جاری کیا۔
ایس پی صدر نبیل کھوکھر سمیت پولیس حکام موقع پر پہنچے اور شواہد حاصل کیے، موقع سے ایک شدید زخمی ڈاکو کو بھی گرفتار کرکے ہسپتال منتقل کیا گیا۔
ایس پی صدر نبیل کھوکھر نے کہا ہے کہ گرفتار ملزم کے دیگر ساتھیوں کو بھی جلد گرفتار کر کے قانون کے کٹہرے میں کھڑا کیا جائے گا واقعے کی تحقیقات مختلف پہلوؤں سے کی جارہی ہے۔ مقتول ڈسٹرک بار راولپنڈی کے رکن بھی رہ چکے ہیں۔
