مری: پاکستان کے سیاحتی مقام مری کے کشمیر پوائنٹ پر نارووال کی ایک فیملی پھنس گئی ہے، فیملی نے حکومت سے مری سے نکالنے کے لیے مدد کی اپیل کی ہے۔
تفصیلات کے مطابق مری میں شدید موسم کے دوران تاریخی برف باری کی وجہ سے بڑا سانحہ پیش آیا ہے، ہزاروں لوگ مری کے سیاحتی مقام پر پھنسے ہوئے ہیں، جب کہ اب تک 22 افراد سردی سے جاں بحق ہو چکے ہیں۔
مری میں اموات کاربن مونو آکسائیڈ گیس جمع ہونے سے ہوئیں، اس بات کی سرکاری سطح پر تصدیق کر دی گئی ہے۔
ایسے حالات میں جہاں متاثرین کو ریسکیو کرنے کے لیے وسیع سطح پر امدادی کارروائیاں جاری ہیں، وہاں اے آر وائی نیوز بھی متاثرین کی آواز بن گیا ہے، مری کے کشمیر پوائنٹ پر پنجاب کے شہر نارروال کا ایک خاندان پھنس گیا ہے، اے آر وائی نیوز نے اس خاندان کی وزیر داخلہ شیخ رشید سے بات کروا دی ہے۔
‘مری میں جاں بحق ہونے والا اے ایس آئی نوید اقبال آخری وقت تک مدد کیلئے پکارتا رہا’
شیخ رشید نے متاثرہ فیملی کی 10 منٹ میں مدد کی یقین دہانی کرائی، شیخ رشید نے اے آر وائی نیوز سے گفتگو میں متاثرین کے لیے امدادی ٹیم بھیجنے کا اعلان بھی کیا۔
مری کے کشمیر پوائنٹ پر پھنسی نارووال کی فیملی نے اپیل کی کہ حکومت انھیں مری سے نکالنے کے لیے مدد کرے، فیملی کی ایک بچی نے بتایا کہ وہ 40 گھنٹوں سے وہاں پھنسے ہوئے ہیں اور کھانے پینے کو کچھ نہیں ہے۔ واضح رہے کہ خواتین اور بچوں سمیت کشمیر پوائنٹ پر 16 افراد پھنسے ہوئے ہیں۔
شیخ رشید نے انھیں جواب دیا کہ 10 منٹ میں ایس پی اور ریسکیو اہل کاروں کو بھیجتا ہوں، آپ بتائیں کس جگہ پھنسے ہیں۔
