مری میں دو تاجر گروپوں کے درمیان مسلح تصادم میں 3 افراد زخمی ہوگئے، پولیس نے 10 ملزمان کو گرفتار کرکے مقدمہ درج کرلیا۔
اے آر وائی نیوز کی رپورٹ کے مطابق مری میں دو مسلح گروپوں کے درمیان تصادم کے بعد پولیس نے دس افراد کو گرفتارکرکے ان کیخلاف مقدمہ درج کرلیا۔
پولیس حکام کے مطابق جی پی او چوک کے قریب دو تاجر گروپوں میں جھگڑا ہوا تھا، اس موقع پر دونوں کی جانب سے کئی گھنٹے فائرنگ اور پتھراؤ کیا گیا۔
فائرنگ اور پتھراؤ سے سیاحوں کی گاڑیوں کے شیشےٹوٹ گئے، اس حوالے سے ترجمان پولیس نے بتایا کہ مری میں حالات اب مکمل طور پر کنٹرول میں ہیں اور مال روڈ کے حالات اب معمول پر آگئے ہیں، سیاحوں نے پھرسیروتفریح شروع کردی ہے۔
ترجمان مری پولیس کا کہنا ہے کہ دونوں گروپوں کے خلاف قانونی کارروائی کی جارہی ہے، کسی کو قانون ہاتھ میں لینے کی اجازت نہیں دی جائے گی۔
قبل ازیں کئی گھنٹے تک فائرنگ اور پتھراؤ کے باعث ملک بھر سے آنے والے سیاحوں میں خوف و ہراس پھیل گیا تھا۔
ان حالات میں پولیس اہلکار مداخلت کے بجائے اپنے موبائل فونز سے ویڈیو بناتے نظر آئے، ذرائع کے مطابق جھگڑا موجودہ اور سابق انجمن تاجران کے دو گروپوں میں ہوا۔
