اسلام آباد : نو مئی 2023کے واقعات کی تحقیقات کے سلسلے میں پی ٹی آئی کے سابق رہنما مسرت چیمہ اور جمشید اقبال چیمہ نے ڈی آئی جی انویسٹی گیشن کو اپنا بیان ریکارڈ کرا دیا۔
تفصیلات کے مطابق پاکستان تحریک انصاف کو خیر باد کہنے والے سابق رہنما جمشید چیمہ اور ان کی اہلیہ مسرت جمشید چیمہ 9 مئی کو ہونے والی توڑ پھوڑ اور جلاؤ گھیراؤ کیس میں شامل تفتیش ہوگئے۔
اس حوالے سے ذرائع کا کہنا ہے کہ مسرت چیمہ اور جمشید چیمہ اپنے وکلاء کے ہمراہ ڈی آئی جی انویسٹی گیشن کے سامنے پیش ہوئے اور دونوں میاں بیوی نے اپنا بیان ریکارڈ کروا دیا ہے۔
حکام نے بتایا کہ دونوں ملزمان کیخلاف 9 مئی کو جلاؤ گھیراؤ اور توڑ پھوڑ کے الزام میں پانچ مقدمات درج ہیں۔
دوسری جانب اٹک جیل میں نو مئی کے جلاؤ گھیراؤ و عسکری تنصیبات پر حملے میں ملوث تیس شرپسندوں کی شناخت پریڈ مکمل کرلی گئی۔
پولیس کا کہنا ہے کہ گواہان نے شناخت پریڈ کی دوران ملزمان کی نشاندہی کی، ملزمان کیخلاف دہشت گردی ایکٹ کے تحت مقدمہ درج ہے جس میں سابق صوبائی وزیر راجہ راشد حفیظ بھی نامزد ہیں۔
پولیس حکام کے مطابق پہلے مرحلے میں42گرفتار ملزمان کی شناخت پریڈ کرائی تھی، ملزمان نے مری روڈ پر توڑ پھوڑ اور حساس ادارے کے دفتر پر پتھراؤ کیا تھا، اس کے علاوہ مری روڈ واقعات پر 72ملزمان گرفتار ہیں۔
