ایلون مسک نے ٹوئٹر صارفین سے رائے مانگ لی ہے کہ کیا میں ٹوئٹر سربراہ کی حثیت سے عہدہ چھوڑ دوں؟
تفصیلات کے مطابق ٹوئٹر کے سی ای او ایلون مسک نے اتوار کو سوشل میڈیا پلیٹ فارم پر ایک پول کا آغاز کیا، جس میں پوچھا گیا کہ کیا انھیں کمپنی کے سربراہ کے عہدے سے سبک دوش ہونا چاہیے؟
انھوں نے کہا کہ وہ پول کے نتائج کی پابندی کریں گے، اور صارفین جو بھی فیصلہ کریں گے انھیں قبول ہوگا۔
سماجی رابطے کی ویب سائٹ پر پولنگ کا عمل جاری ہے، 56 فی صد سے زائد صارفین نے ایلون مسک کو عہدہ چھوڑنے کا مشورہ دے دیا ہے۔
Should I step down as head of Twitter? I will abide by the results of this poll.
— Elon Musk (@elonmusk) December 18, 2022
یہ پول پیر کو دوپہر کے قریب بند ہونے والا ہے، تاہم ارب پتی سی ای او مسک نے اس بارے میں تفصیلات نہیں بتائیں کہ وہ کب اپنے عہدے استعفیٰ دیں گے اگر پول کے نتائج ان کے خلاف آئے۔
سی ای او کی ممکنہ تبدیلی پر ایک ٹوئٹر صارف کے تبصرے کا جواب دیتے ہوئے ایلون مسک نے کہا کہ ان کا کوئی جانشین نہیں ہے۔ واضح رہے کہ مسک نے گزشتہ ماہ ڈیلاویئر کی ایک عدالت کو بتایا تھا کہ وہ ٹوئٹر پر اپنا وقت کم کر دیں گے اور کمپنی کو چلانے کے لیے ایک نیا لیڈر تلاش کر لیں گے۔
