اٹلی میں مقامی فٹبال میچ کے دوران افطار کا ٹائم ہوا تو ایک اطالوی فٹبالر نے اپنے ساتھی مسلم کھلاڑی کو دوران میچ روزہ افطار کرنے کا موقع فراہم کیا۔
غیر ملکی میڈیا کے مطابق اٹلی میں مقامی فٹبال کلب فیورینتینا کا میچ جاری تھا اور اس میں ایک مسلم کھلاڑی سفیان امرابط بھی شامل تھا۔ میچ کے دوران افطار کا وقت ہوا تو اس کے ساتھی کھلاڑی لوکا رانییری نے سفیان کو افطار کا موقع فراہم کرنے کے لیے خود کو مبینہ طور پر زخمی ظاہر کیا۔
میچ ختم ہونے سے کچھ لمحے پہلے انجری ٹائم میں فیورنٹینا کے لوکا رینیئر میدان میں گر پڑے اور طبی عملے کو بلا لیا۔ جس کے باعث میچ کچھ دیر رکا اور اسی وقفے کے دوران سفیان نے اپنا مذہبی فریضہ ادا کرتے ہوئے روزہ افطار کرلیا۔
اس دوران کیمرا ان کے ساتھی فٹ بالر سفیان پر فوکس ہوگیا جنہیں روزہ افطار کرتے دیکھا گیا۔
During the Inter vs Fiorentina match, Luca Ranieri faked an injury to enable his teammate Sofyan Amrabat to break his Ramadan fast! ❤️
— PurelyFootball ℗ (@PurelyFootball) April 1, 2023
اس حوالے سے سماجی رابطوں کی ویب سائٹ ٹوئٹر پر ویڈیو وائرل ہوئی ہے جس میں دیکھا جا سکتا ہے کہ انٹرمیلان کے خلاف کلب میچ کے دوران اچانک لوگا رانییری نے خود کے زخمی ہونے کا اشارہ کیا جس کے باعث کچھ دیر کے لیے میچ روکا گیا اور انہیں طبی امداد فراہم کی گئی تاہم اسی دوران لوگا کا مسلمان ساتھی کھلاڑی سفیان امرابط میدان میں ہی کھڑا ہو کر کیلا کھاتے اور پانی پیتے نظر آتے ہیں۔
سفیان امرابط کے اس طرح میدان میں کھانے اور پینے سے شائقین کو معلوم ہوا کہ مسلمان فٹبالر روزہ رکھ کر میچ کھیل رہے تھے اور روزے کا وقت مکمل ہونے پر انہیں ساتھی فٹبالر کی جانب سے افطار کا موقع فراہم کیا گیا۔
واضح رہے کہ گزشتہ دنوں فرنچ فٹ بال فیڈریشن نے افطار کے لیے مسلمان کھلاڑیوں کو میچ کے دوران وقفہ نہ دینے کا فیصلہ کیا تھا۔