کراچی :ایم کیو ایم پاکستان کے رہنما مصطفیٰ کمال کا کہنا ہے کہ پیپلزپارٹی کی نا اہلی نے ہماری غلطی پر بھی پردہ ڈال دیا، بلاول نے اگر پنجاب میں کہہ دیا کہ لاہور کو کراچی بنادیں گے تو لاہور والے بھاگ جائیں گے۔
تفصیلات کے مطابق کراچی میں ایم کیو ایم پاکستان کے رہنما مصطفیٰ کمال نے این اے242بلدیہ ٹاؤن میں خطاب کرتے ہوئے کہا کہ دنیا چاند پر جا رہی ہے اور ہم آج تک گٹر کے ڈھکن نہیں لگا سکے، کراچی گاؤں گوٹھ نہیں بلکہ75 فیصد ریونیو دینے والا شہر ہے۔
مصطفیٰ کمال کا کہنا تھا کہ ہمیں چوری نہیں ڈکیتی کاموقع ملالیکن ہم نےحرام کانوالہ نہیں لیا، ایک نظامت کےدورمیں 300 ارب روپےخرچ کیے، مجھ پرایک روپےکی کرپشن کابھی الزام نہیں لگایاجاسکتا۔
رہنما ایم کیوایم پاکستان نے کہا کہ ہمارے پاس ایسی سیٹیں ہیں جہاں ایک باربھی نہ جاؤں لیکن ایم این اےبن جاؤں لیکن بلدیہ کی سیٹ بہت مشکل ہے یہاں بہت حریف ہیں، بلدیہ ٹاؤن کی پسماندگی دیکھ کریہاں سے الیکشن لڑ رہا ہوں، بلدیہ میں پورے سال صرف 6 گھنٹے پانی آتا ہے۔
ان کا کہنا تھا کہ پیپلز پارٹی کی نااہلی نے ہماری غلطی پر بھی پردہ ڈال دیا، پیپلزپارٹی نے کہا لاہور کو کراچی بنائیں گے تو لاہور والے بھاگ جائیں گے کیونکہ لاہور والے جانتے ہیں اگر ایسا ہوا تو گٹر کے ڈھکن نہیں ملیں گے۔
مصطفیٰ کمال نے خطاب میں کہا کہ موقع ملاتو بلدیہ ٹاؤن کو ماڈل علاقہ بناؤں گا ، ہم سےاچھاکوئی ہوتاتواپنےکاموں سےہماری سیاست ختم کردیتا، پیپلزپارٹی 15 سال کام کرتی تولوگ ہمیں بھگا دیتے، پیپلزپارٹی سندھ میں ایک یوسی نہیں دکھاسکتی جہاں کام کیاہو، 15سال22ہزارارب خرچ کرنے کے بعد ایک ماڈل یوسی نہیں بناسکے۔
بلاول کے دعویٰ کے حوالے سے رہنما ایم کیو ایم کا کہنا تھا کہ بلاول کہہ سکتےہیں پاکستان کوسندھ جیسابنادیں گے؟ ہم لاہورمیں کہہ سکتے ہیں کہ لاہور کو کراچی جیسابنادیں گے، کراچی والوں کےپاس ہمارےسواکوئی آپشن نہیں۔
انھوں نے مزید کہا کہ 5 سال سندھ ہمارےحوالےکردوپی پی کی لاڑکانہ،لیاری میں ضمانت ضبط کرادیں گے۔
