یہ جان کر آپ حیران رہ جائیں گے کہ الجزائر میں ماحولیاتی ادارے نے مینا نامی مشہور پرندے کے پھیلاؤ پر نہایت تشویش کا اظہار کیا ہے اور ماحولیاتی نظام ہی نہیں بلکہ انسانوں کے لیے بھی اس کے پھیلاؤ کے سلسلے خطرے کی گھنٹی بجا دی ہے۔
بتایا جا رہا ہے کہ مینا ماحولیاتی نظام اور انسانوں کے لیے خطرناک ہے، یہ خاص طور پر زرعی فصلوں کے لیے خطرناک سمجھا جاتا ہے، کیوں کہ یہ اناج، پھل سبزیوں کو کھا جاتا ہے اور انھیں نقصان پہنچاتا ہے، اس طرح کسانوں کو بہت نقصان پہنچاتا ہے، یہ پرندہ جنگلات پر حملہ آور ہوتا ہے، اور اسے عالمی ادارہ ماحولیات کی طرف سے دنیا کے تین خطرناک ترین پرندوں میں شمار کیا جاتا ہے۔
الجزائر میں پرندوں کی افزائش کے فروغ کے لیے ایسوسی ایشن کے دفتر کے ایک رکن مصطفی عادل غریب نے وضاحت کی کہ ایسوسی ایشن کے ایک ممبر نے دارالحکومت الجزائر میں مینا پرندے کی موجودگی دیکھی ہے، اور اس سے قبل پڑوسی ممالک میں اس کے پھیلاؤ کو دیکھا گیا تھا۔
ترجمان نے کہا کہ ایسوسی ایشن کے ایک رکن نے فیلڈ ٹرپ کے دوران ایک جوڑے کو دیکھا اور ان کی تصاویر بھی لیں، جیسے ہی ہم نے اسے سوشل نیٹ ورکنگ سائٹس پر اپنے صفحات پر شائع کیا تو مختلف متعلقہ محکموں نے ہم سے براہ راست رابطہ کیا اور انھوں نے فوری جواب دیا۔
مینا پرندے کے خطرے کے بارے میں عادل غریب نے بتایا کہ ہم نے پہلی بار الجزائر میں اس پرندے کی موجودگی کا پتہ چلایا ہے، یہ پرندہ ہزاروں کے گروہوں میں حملہ کرتا ہے، ایک غیر ملک میں فلمائی گئی ایک ویڈیو کے مطابق اس کے گروہ میں شامل پرندوں کی کی تعداد 5000 تک پہنچ جاتی ہے۔
پرندوں کی افزائش کے لیے ایسوسی ایشن کے ایک رکن نے کئی تجاویز اور اقدامات تجویز کیے جو ان کے مطابق اس پرندے کے خطرے کو کم کرنے کے لیے اٹھائے جانے چاہئیں۔
