کراچی: ستمبر میں کراچی کے علاقے سولجر بازار سے لاپتا خاتون اور مرد کی پر اسرار موت ہو گئی، پولیس نے تحقیقات شروع کر دیں۔
تفصیلات کے مطابق سولجر بازار سے 9 ستمبر کو لاپتا ہونے والی شادی شدہ خاتون سائرہ اور رضوان نامی شادی شدہ مرد نے مبینہ طور پر زہریلی شے پی کر خود کشی کر لی، سولجر بازار پولیس نے جناح اسپتال پہنچ کر تحقیقات کا آغاز کر دیا۔
پولیس کا کہنا ہے کہ خاتون اور مرد نے مبینہ طور پر کلفٹن کے ایک مال کے قریب کوئی زہریلی شے پی لی تھی، مرنے والی خاتون اور مرد دونوں شادی شدہ ہیں۔
پولیس حکام کے مطابق سائرہ اور رضوان دونوں اپنے اپنے گھر سے لا پتا ہو گئے تھے، سائرہ کے شوہر کے مطابق ہلاک خاتون 9 ستمبر سے لاپتا تھی، اور ان کی جانب سے بیگم کی گمشدگی کی اطلاع سولجر بازار تھانے میں دی گئی تھی۔
ہلاک مرد رضوان بھی شادی شدہ ہے اور وہ بھی گھر سے غائب تھا، اہل خانہ کو مبینہ زہر خورانی کی اطلاع ملی تو وہ دونوں کو گھر لے کر آ گئے تھے۔ بتایا گیا ہے کہ سائرہ اور رضوان کی تلاش میں دونوں کے اہل خانہ ساتھ تھے، ابتدائی بیان کے مطابق دونوں کو جب گھر لایا گیا تو اس کے بعد جب ان کی طبیعت زیادہ خراب ہوئی تو انھیں اسپتال منتقل کیا گیا، تاہم اسپتال پہنچنے پر پتا چلا دونوں مر چکے ہیں۔
سائرہ اور رضوان نامی شخص کی لاشیں جناح اسپتال منتقل کر دی گئی ہیں، پولیس کی جانب سے ابتدائی بیان کے حوالے سے تفتیش کی جا رہی ہے جس میں دیکھا جائے گا کہ اگر ان کی طبیعت زیادہ خراب تھی تو کلفٹن سے اسپتال لے جانے کی بجائے انھیں گھر کیوں منتقل کیا گیا اور مزید تحقیقات بھی کی جائیں گی۔
میڈیکو لیگل افسر کا بیان
ایس ایچ او سولجر بازار وقار عظیم نے بتایا کہ مرنے سے پہلے رضوان نے میڈیکو لیگل افسر عبدالباسط سے بات کی تھی، رضوان نے ایم ایل او کو بتایا کہ ہم سی ویو پر موجود تھے جہاں ہم دونوں نے زہر پیا، زہر پینے کے بعد ہم دونوں کو گھر والے سولجر بازار گھر لے کر گئے، ہلاک شخص نے ایم ایل او کو یہ بھی بتایا کہ انھیں سولجر بازار سے پھر جناح اسپتال منتقل کیا گیا۔
