لاہور : مسلم لیگ ق کے رہنما اور وزیر اعلیٰ پنجاب پرویز الہٰی کے صاحبزادے چوہدری مونس الہٰی اور ان کی اہلیہ نیب لاہور کے ریڈار پر آگئے۔
قومی احتساب بیورو (نیب) لاہور نے وزیراعلیٰ پنجاب کے صاحبزادے مونس الہٰی اور ان کی اہلیہ کی جائیداد کا ریکارڈ طلب کرلیا۔
اس حوالے سے ذرائع کا کہنا ہے کہ نیب لاہور نے الحیات کمپنی کے سیکرٹری سے جائیدادوں کا ریکارڈ اور مونس الہیٰ اور ان کے خاندان کو ملنے والے منافع اور قرض کا ریکارڈ بھی طلب کیا ہے۔
نیب ذرائع کے مطابق چوہدری مونس الہٰی اور ان کی فیملی کی جائیدادوں کے ریکارڈ کی طلبی کے باوجود تاحال جمع نہیں کرایا گیا ہے۔
واضح رہے کہ عدالت نے گزشتہ ہفتے مونس الٰہی کی بیرون ملک جائیدادوں پر ٹیکس کیس کا تحریری حکم جاری کیا تھا، لاہور ہائیکورٹ کے جسٹس شاہد جمیل نے کیس کی فائل چیف جسٹس کو بھیج دی۔
مزید پڑھیں : عدالت نے مونس الٰہی سمیت دیگر کیخلاف چالان داخل دفتر کردیا
تحریری حکم میں کہا گیا ہے کہ جسٹس عاصم حفیظ کے پاس درخواست پہلے بھی زیرسماعت ہے، درخواست جسٹس عاصم حفیظ کی عدالت میں سماعت کیلئے مقرر کی جائے، درخواست میں وفاقی حکومت، پنجاب حکومت سمیت دیگر کو فریق بنایا گیا۔
