کراچی: شہر قائد کے علاقے کلفٹن میں سرکاری پلاٹوں کی غیرقانونی الاٹمنٹ کا انکشاف ہوا ہے۔
تفصیلات کے مطابق کراچی کے علاقے کلفٹن میں غیرقانونی الاٹمنٹ سے قومی خزانے کو 30 کروڑ روپے کا نقصان پہنچانے کا انکشاف ہوا ہے، نیب نے کے ایم سی افسران ودیگر کے خلاف ریفرنس کی منظوری دے دی۔
نیب کراچی نے مرحوم کے ایم سی ڈائریکٹر اشفاق انصاری کے خلاف بھی ریفرنس تیار کرلیا، ریفرنس میں تین پرائیویٹ افراد کے نام بھی شامل ہیں۔
نیب کے مطابق اشفاق انصاری ودیگر ملزمان نے کلفٹن میں 2 پلاٹوں کی غیرقانونی الاٹمنٹ کی، کے ایم سی افسران نے اپنے عہدے کا ناجائز استعمال کیا۔
مزید پڑھیں: ایف آئی اے ملازمین کی تنخواہیں اور مراعات نیب کے مساوی کرنے کی منظوری
نمائندہ اے آر وائی نیوز کے مطابق سندھ حکومت کی ملکیت دونوں پلاٹوں کو ملی بھگت سے الاٹ کیا گیا، ملزمان نے سرکاری پلاٹوں کی جعلی اور غیرقانونی دستاویزات بنائیں۔
الاٹمنٹ کے بعد غیرقانونی طور پر دونوں پلاٹوں کو لیز بھی کیا، ملزمان نے بدعنوانی سے سرکاری خزانے کو 30 کروڑ روپے کا نقصان پہنچایا۔
واضح رہے کہ کراچی کے مختلف علاقوں میں ریلوے کی زمینوں پر بھی پلاٹوں پر قبضہ کیا گیا تھا جسے اب سپریم کورٹ کے حکم کے بعد کارروائی کرکے واگزار کرایا جارہا ہے۔
