اسلام آباد: قومی اداراہ احتساب (نیب) نے سابق صدر مملکت آصف علی زرداری کی بریت کے خلاف اپیلیں 7 سال بعد واپس لینے کا فیصلہ کیا ہے۔

تفصیلات کے مطابق سابق صدر مملکت آصف علی زرداری کے خلاف 25 سال پرانے کیسز میں بڑی پیشرفت سامنے آئی ہے، قومی اداراہ احتساب (نیب) نے آصف زرداری کی بریت کے خلاف اپیلیں واپس لینے کا فیصلہ کیا ہے۔

اس سلسلے میں نیب نے 4 اپیلیں واپس لینے کی درخواست ہائیکورٹ میں دائر کر دی، نیب کا کہنا ہے کہ اپیلوں کی مزید پراسیکیوشن ایک لاحاصل مشق ہوگی۔

نیب کے مطابق آصف زرداری کے خلاف دستاویز کی فوٹو کاپیاں بھی مشکل سے ریکارڈ پر ہیں، دستیاب دستاویزی شواہد، قانون شہادت کے مطابق نہیں۔

خیال رہے کہ نیب نے آصف زرداری کی بریت کو سنہ 2015 سے چیلنج کر رکھا تھا۔