حکومت اور پیپلز پارٹی کے درمیان مذاکرات کا دور ختم ہوگیا اور وفاق نے پنجاب کے امور پر پی پی کے تمام مطالبات تسلیم کر لیے ہیں۔
اے آر وائی نیوز کے مطابق پاکستا ن پیپلز پارٹی کے رہنما اور مذاکراتی کمیٹی کے رکن ندیم چن نے مذاکرات کے اختتام پر اسلام آباد میں میڈیا سے گفتگو کرتے ہوئے خوشخبری دی ہے کہ حکومت اور پی پی کے درمیان مذاکرات کامیاب ہوگئے ہیں اور شہباز حکومت نے ہمارے تمام مطالبات تسلیم کر لیے ہیں۔
ندیم افضل چن نے کہا کہ ن لیگ کے ساتھ خوش اسلوبی سے بات چیت ہوئی۔ پنجاب کے معاملات میں اسپیس کا ایشو تھا۔ پی پی چاہتی ہے کہ کوئی انتقام کا نشانہ نہ بنے اور صوبے میں اچھی گورننس دی جائے۔
انہوں نے کہا کہ مسلم لیگ ن کے ساتھ کافی حد تک بات ہو چکی ہے اور حکومت نے پی پی کے تمام مطالبات تسلیم کر لیے ہیں۔ اب تحریری معاہدے پرعملدرآمد سے متعلق بات ہو رہی ہے۔
پی پی رہنما نے کہا کہ معاہدے میں ایک سال کے اندر پنجاب میں بلدیاتی انتخابات کرانے کی بات ہوئی اور بلدیاتی الیکشن کے حوالے سے ہماری مشاورت شام کی جائے گی جب کہ معاہدے پر عملدرآمد سے متعلق کمیٹیوں کی ہر 15 دن بعد میٹنگ ہوگی۔
