معروف پاکستانی ماڈل و اداکارہ نادیہ حسین نے اپنے شوہر کی گرفتاری کے معاملے پر ایف آئی اے افسر پر رشوت طلبی کا الزام عائد کردیا۔
انسٹا گرام آئی ڈی پر اپنے ویڈیو پیغام میں نادیہ حسین نے ایف آئی اے افسر پر رشوت طلبی کا الزام عائد کرتے ہوئے کہا کہ اس نے مجھ سے بھاری رشوت طلب کی۔
اداکارہ نے سوشل میڈیا پر ایف آئی اے افسر سے ہونے والی بات چیت کی مبینہ آڈیو بھی شیئر کردی۔
اس حوالے سے ایف آئی اے کے ایک افسر نے مؤقف اختیار کیا کہ نادیہ سے کل شام ہماری بات ہوئی تھی، انہوں نے ہمیں آڈیو اور رشوت طلبی سے متعلق آگاہ کیا تھا۔
ایف آئی اے افسر کا کہنا ہے کہ ہم نے کل ہی بتادیا تھا کہ رشوت طلبی کی کال کرنے والا شخص فراڈ ہے جس کا تعلق پنجاب کے شہر وہاڑی سے ہے۔
اس جعل ساز نے اپنے موبائل نمبر پر ایف آئی اے افسر کی ڈی پی لگا رکھی تھی، اس کا نمبر بھی ٹریس کرلیا گیا ہے۔
افسر کا کہنا ہے کہ فراڈ شخص نے صرف نادیہ حسین کو ہی نہیں بلکہ بینک اسٹاف کو بھی متعدد فون کیے، اس بات کی وضاحت کے باوجود اداکارہ نے ایف آئی اے پر بڑا الزام عائد کردیا ہے۔
ایف آئی اے افسر کا مزید کہنا ہے کہ اس ویڈیو کے پوسٹ کرنے کے بعد اداکارہ نادیہ کیخلاف سائبر ایکٹ کے تحت کارروائی کی جاسکتی ہے۔
واضح رہے کہ رواں ماہ 8 مارچ کو وفاقی تحقیقاتی ادارے (ایف آئی اے) کارپوریٹ کرائم سرکل نے معروف پاکستانی اداکارہ نادیہ حسین کے گھر پر چھاپہ مار کر ان کے شوہر عاطف احمد خان کو بینک فراڈ کیس میں گرفتار کیا تھا۔
ملزم عاطف خان سے ایف آئی اے کی جانب سے تفتیش جاری ہے، ذرائع کا کہنا ہے کہ عاطف کے فراڈ کا سلسلہ 2016 سے دسمبر 2023 تک چلتا رہا تھا۔
ایف آئی اے ذرائع کے مطابق 7 سال میں بینکنگ گروپ کو 1 ارب 20 کروڑ کا نقصان ہوا، یہ بات ناقابل یقین ہے کہ بورڈ اس فراڈ سے بے خبر تھا، پتہ چلانے کی کوشش کررہے ہیں کہ فراڈ میں اور کون لوث ہے، کیوں کہ عاطف خان کے علاوہ دیگر کئی افراد کا کردار بھی مشکوک ہے۔
