اسلام آباد: وزارت نجکاری نندی پور اور گڈو پاور پلانٹ سے متعلق بڑا فیصلہ کرتے ہوئے انھیں نجکاری فہرست سے نکالنے جا رہی ہے۔
تفصیلات کے مطابق نگراں حکومت نے نندی پور اور گڈو پاور پلانٹ کی نج کاری منسوخ کرنے کا فیصلہ کیا ہے، ذرائع کے مطابق نندی پور پاور اور گڈو پاور کو نج کاری فہرست سے نکالا جا رہا ہے۔
کابینہ کی نج کاری کمیٹی کا 2018 کا فیصلہ منسوخ کیا جائے گا، دونوں پلانٹس پاکستان اسٹیٹ آئل کو دینے پر غور کیا جا رہا ہے، نندی پور اور گڈو پاور دونوں پر سوئی گیس کمپنیوں کے اربوں روپے کے واجبات ہیں۔
- Advertisement -
ذرائع وزارت نجکاری کا کہنا ہے کہ وفاقی حکومت پی ایس او کے ذریعے سوئی گیس کمپنیوں کے واجبات کلیئر کرائے گی، چوں کہ سوئی گیس کمپنیوں کے واجبات پی ایس او کو ادا کرنے ہیں، اس لیے پی ایس او کو واجبات کی بجائے نندی پور اور گڈو پاور دینے کی تجویز زیر غور ہے۔
