لاہور: پاکستان کرکٹ بورڈ نے قومی ٹی 20 کپ میں کھلاڑیوں کی آمدن میں خاطر خواہ اضافہ کر دیا، ایونٹ کی فاتح ٹیم کو 50 لاکھ روپے کی انعامی رقم دی جائے گی۔
تفصیلات کے مطابق پی سی بی نے قومی ٹی 20 کپ کے سلسلے میں انعامی رقم میں اضافہ کیا ہے، فاتح ٹیم کو پچاس لاکھ جب کہ رنرز اَپ ٹیم کو 25 لاکھ روپے کی انعامی رقم دی جائے گی۔
ایونٹ کے بہترین بیٹسمین، بولر اور وکٹ کیپر کو 1،1 لاکھ کی انعامی رقم دی جائے گی، قومی ٹی 20 کپ کا بہترین کھلاڑی بھی ایک لاکھ روپے کی انعامی رقم وصول کرے گا۔
پی سی بی کے اعلامیے کے مطابق پلیئر آف دی فائنل کو 35 ہزار روپے انعام دیا جائے گا، ایونٹ کے دوران مین آف دی میچ کے لیے 25 ہزار روپے بہ طور انعام مقرر کیے گئے ہیں۔
یہ بھی پڑھیں: ٹی 20 سیریز، سری لنکا نے پاکستان کو کلین سویپ کردیا
پلیئنگ الیون میں شامل ہر کھلاڑی 40 ہزار روپے بہ طور میچ فیس وصول کرے گا، نان پلیئنگ الیون میں شامل کھلاڑی 16 ہزار روپے میچ فیس وصول کریں گے۔
یاد رہے کہ پاکستان اور سری لنکا کے درمیان حالیہ کھیلی جانے والی تین میچز پر مشتمل ٹی 20 سیریز میں پاکستان کے خلاف سری لنکا نے کلین سویپ کیا، قذافی اسٹیڈیم میں کھیلے جانے والے تیسرے میچ میں سری لنکا نے پاکستان کو 13 رنز سے شکست دی۔
سری لنکا کی ٹیم کے کوچ رمیش رنا ئیکے نے کہا تھا کہ ہماری ٹیم نے ٹی ٹونٹی سیریز میں بہترین کرکٹ کھیلی، پاکستان آ کر کھیلنے سے بہت خوشی ہوئی، یہاں سے ملنی والی محبتوں کو ہمیشہ یاد رکھیں گے۔
