نیٹو کے سربراہ جینز اسٹولٹن برگ نے ترکی پر زور دیا ہے کہ وہ فوجی اتحاد میں شامل ہونے کے لیے سویڈن کی بولی کو ویٹو نہ کرے۔
سکریٹری جنرل اسٹولٹن برگ نے استنبول میں ترک صدر رجب طیب اردوان اور ان کے نئے تعینات ہونے والے وزیر خارجہ، انٹیلی جنس ایجنسی کے سابق سربراہ ہاکان فیدان سے ملاقات کے بعد صحافیوں کو بتایا رکنیت نہ صرف سویڈن کو محفوظ بنائے گی بلکہ نیٹو اور ترکی کو بھی مضبوط بنائے گی۔
اسٹولٹن برگ نے مزید کہا، میں جلد از جلد سویڈن کی نیٹو سے الحاق کو حتمی شکل دینے کا منتظر ہوں۔
سویڈن اور فن لینڈ کے بارے میں ترکی کے خدشات کو دور کرنے کے لیے قائم کیے گئے مستقل مشترکہ میکانزم کا حوالہ دیتے ہوئے ان کا کہنا تھا کہ ترکی، سویڈن اور فن لینڈ کے حکام اگلے ہفتے ان مسائل کو حل کرنے کی کوشش کریں گے جن کی وجہ سے سویڈن کی نیٹو رکنیت میں تاخیر ہوئی ہے۔
مارچ میں، ترکی نے رکنیت کے لیے فن لینڈ کی بولی کی توثیق کی، اور اپریل میں یہ نیٹو کا 31 واں رکن بن گیا۔
سویڈن اور فن لینڈ ترکی کی حمایت کے بغیر نیٹو میں شامل نہیں ہو سکتے تھے کیونکہ نیٹو کے کسی بھی فیصلے کے لیے تمام 30 رکن ممالک کی منظوری درکار ہوتی ہے۔
فن لینڈ اور سویڈن کی نیٹو اتحاد میں شمولیت کی حمایت پر بائیڈن انتظامیہ نے ترکیہ کو ایف 16 طیاروں کی ممکنہ فروخت کی حمایت کردی ہے۔
امریکا کا کہنا ہے کہ ایف 16 طیاروں کی فروخت سے ترکیہ کی مضبوط دفاعی صلاحیتوں سے نیٹو کے دفاع کو تقویت ملے گی، امریکا ترکیہ لڑاکا بیڑے کو جدید بنانے کی حمایت کرتا ہے۔
خیال رہے کہ امریکا نے روس سے S-400 دفاعی میزائل سستم خریدنے پر ترکیہ پر پابندیاں عائد کرتے ہوئے ایف – 35 فروخت کرنے سے انکار کردیا تھا، تاہم اب ترکی نے فن لینڈ اور سوئیڈن کی نیٹو میں شمولیت کی حمایت کے بدلے عالمی طاقتوں سے متعدد رعائتیں حاصل کرلی ہے۔
