نیٹو اجلاس میں یوکرین کی رکنیت پربات نہیں ہوگی، یوکرین کا نیٹو میں شامل ہونا خاموشی سے نظر انداز کیا جائے گا۔
فرانسیسی خبر رساں ایجنسی کی رپورٹ کے مطابق نیٹو کے رکن ممالک ایک مختصر اعلامیہ تیار کرنے پر غور کر رہے ہیں جس میں یوکرین کی ممکنہ نیٹو رکنیت کا ذکر نہیں کیا جائے گا تاکہ اتحاد کے اندر اختلافات پیدا نہ ہوں۔
یہ رپورٹ گزشتہ روز ایجنسی فرانس پریس (اے ایف پی) نے اپنے ذرائع کے حوالے سے دی ہے۔ رپورٹ میں کہا گیا ہے کہ امریکی دباؤ اور اختلافات کے خدشے پر نیٹو یوکرین مسئلے سے گریز کریگا۔
امریکی صدر نے اپنے ایک گزشتہ بیان میں مخالفت کرتے ہوئے کہا تھا کہ یوکرین نیٹو کو بھول جائے، یوکرینی صدر نیٹو اجلاس میں شرکت کرینگے مگر رسمی گفتگو کا امکان نہیں ہے۔
فرانسیسی خبر ایجنسی کے مطابق نیٹو اجلاس کا محور دفاعی اخراجات میں اضافہ ہوگا یوکرین نہیں،
نیٹو میں دراڑ سے بچنے کے لیے یوکرین پر بات ٹال دی گئی ہے۔
رپورٹ کے مطابق یوکرینی حکام کے ساتھ کسی قسم کی باضابطہ بات چیت کی بھی توقع نہیں ہے، اگرچہ صدر ولادیمیر زیلنسکی کو اجلاس میں شرکت کی دعوت دی گئی ہے۔
اس کے علاوہ نیٹو ممالک کیف کو فوجی امداد دینے کے بارے میں بھی کوئی مشترکہ بیان جاری نہیں کریں گے کیونکہ امریکہ کی طرف سے نئی امداد معطل کردی گئی ہے۔ واضح رہے کہ یہ اجلاس جون میں دی ہیگ (ہالینڈ) میں منعقد ہوگا۔
