لاہور : مسلم لیگ ن کے قائد نواز شریف کل حافظ آباد میں اپنے پہلے انتخابی جلسے سے خطاب کریں گے۔
تفصیلات کے مطابق ن لیگ کے قائد میاں نواز شریف کل سے انتخابی مہم کا آغاز کریں گے اور حافظ آباد میں ن لیگ کے انتخابی جلسے سے خطاب کریں گے، مریم نواز بھی نواز شریف کے ہمراہ حافظ آباد جائیں گے۔
گذشتہ روز مسلم لیگ ن کی چیف آرگنائزر مریم نواز نے گجومتہ میں انتخابی مہم سے خطاب کرتے ہوئے کہا تھا کہ لاہور سے وعدہ ہے شیر کو جتواؤ دن رات خدمت کریں گے ، کہیں سے میٹروبس اور کہین اسپیڈوبس گزر رہی ہے، جگہ جگہ آپ کو نوازشریف کے منصوبے نظرآئیں گے۔
مریم نواز کا کہنا تھا کہ لاہور میں ن لیگ نے خدمت کے ریکارڈ قائم کیے تھے، جو پچھلے 4 سال لاہور میں گھسے وہ کوئی ترقی نہیں کرسکے، لاہور کو لاوارث بنادیا کوئی کوڑا اٹھانے والا نہیں، ان کو 8فروری کو لاہور سے اٹھا کر باہر پھینک دینا ہے۔
ٓن لیگی رہنما نے کہا تھا کہ 8 فروری کے بعد ترقی کا پہیہ جہاں سے رکا تھا وہیں سے شروع کریں گے، 5سال بعد لاہور میں شیر واپس آئے گا،ترقی واپس آئے گی، جتنی مہریں شیر پر لگیں گی اتنی تیزی سے ترقی ہوگی۔
