اسلام آباد: امیگریشن ذرائع کا کہنا ہے کہ قانون کے مطابق نواز شریف کا نام ای سی ایل ہی میں رہے گا، عدالتی احکامات دکھا کر نواز شریف علاج کے لیے باہر جا سکیں گے۔
تفصیلات کے مطابق امیگریشن ذرائع نے کہا ہے کہ نواز شریف سزا یافتہ مجرم ہیں، انھیں ون ٹائم بیرون ملک جانے کی اجازت ملی ہے، قانون کے تحت نام ای سی ایل میں شامل رہے گا۔
ذرائع کا کہنا تھا کہ علامہ اقبال انٹرنیشنل ایئرپورٹ انتظامیہ کو ابھی تک ائیر ایمبولینس امد کی کوئی اطلاع نہیں ملی ہے جبکہ ن لیگی ذرائع نے کہا ہے کہ ڈاکٹروں کی اجازت ملنے کے بعد ائیر ایمبو لینس کل لاہور پہنچے گی، جس کے بعد نواز شریف کی لندن روانگی کے امکانات ہیں۔
مزید پڑھیں : نواز شریف کل علاج کے لیے بیرون ملک روانہ ہوں گے
اس سے قبل مسلم لیگ ن کی ترجمان مریم اورنگزیب نے سماجی رابطے کی ویب سائٹ ٹوئٹر پر کہا تھا کہ قائد محمد نواز شریف قوم کی دعاؤں میں کل علاج کے لیے بیرون ملک روانہ ہوں گے، شہباز شریف اور ڈاکٹر عدنان ان کے ہمراہ روانہ ہوں گے۔
مریم اورنگزیب کا کہنا تھا کہ ڈاکٹرز نے محمد نوازشریف کا تفصیلی طبی معائنہ کیا ہے ، پلیٹ لیٹس کی تعداد مستحکم رکھنے کے لیے ہائی ڈوز اسٹرائیڈز دی جارہی ہیں تاکہ جسم میں پلیٹ لیٹس کی مقدار سفر کے قابل ہو سکے جبکہ ہائی بلڈ شوگر، ہارٹ اور دیگر طبی خطرات کو کم سے کم سطح پر لانے کے لئے بھی دوائیں دی جا رہی ہیں۔
