لاہور: مینارِ پاکستان پر نواز شریف کے جلسے میں بدنظمی کے باعث پولیس کو لاٹھی چارج کرنا پڑا، کارکنان نے واک تھرو گیٹ گرا دیے۔
تفصیلات کے مطابق مسلم لیگ ن کے کارکنان نے زبردستی خواتین انکلوژر میں داخل ہونے کی کوشش کی۔ اسی کوشش میں لوگوں نے واک تھرو گیٹ گرادیے۔
پولیس نے کارکنان کو خواتین انکلوژر میں جانے سے روکنے کے لیے لاٹھی چارج بھی کیا۔ پولیس اورلیگی کارکنان کے درمیان تلخ کلامی بھی ہوئی۔
واضح رہے کہ مسلم لیگ ن کے قائد نواز شریف کی وطن واپسی کے موقع پر مینار پاکستان میں پارٹی نے جلسہ کیا، نواز شریف کی لاہور آمد پر مریم نواز اور مریم اورنگزیب آبدیدہ بھی نظر آئیں۔
سابق وزیر اعظم نے مینارِ پاکستان پر جسلے سے خطاب میں کہا کہ میرے دل میں انتقام کی کوئی تمنا نہیں اور نہ کسی بدلے کی تمنا ہے، تمنا ہے تو بس یہی ہے کہ میری قوم کے لوگ خوشحال ہو جائیں۔
نواز شریف نے کہا کہ عمر کے اس حصے میں ملک کی تبدیلی چاہتا ہوں، عوام آئندہ کسی کو اجازت نہ دیں کہ آپ کے ملک کے ساتھ کوئی کھلواڑ کر سکے۔
انھوں نے کہا کہ جب بھی موقع ملا بڑے خلوص کے ساتھ عوام کی خدمت کی، جیلوں میں مجھے ڈالا گیا، ملک بدر کیا گیا اور جعلی کیسز بنائے گئے لیکن اس باوجود مسلم لیگ ن کا جھنڈا ہاتھ سے نہیں چھوڑا۔
