اسلام آباد : چیئرمین این ڈی ایم اے لیفٹیننٹ جنرل انعام حیدر کی سربراہی میں این سی اوسی کا اجلاس ہوا، جس میں قومی ادارہ برائے صحت اسلام آباد اور این سی او سی نے نیشنل ڈیزاسٹر مینجمنٹ اتھارٹی کو بریفنگ دی۔
این سی او حکام نے این ڈی ایم اے کو بریفنگ میں بتایا کہ ایئرپورٹس، ملکی انٹری پوائنٹس پرسرویلنس بڑھا دی گئی ہے، ملک بھر کے اسپتالوں میں انتہائی نگہداشت کے تمام شعبے فعال ہیں۔
این سی او سی حکام کے مطابق تمام صوبوں، وفاقی دارالحکومت میں لیبارٹریز میں کورونا وائرس کی سیکونسگ کی جارہی ہے، کورونا کے نئے سب ویریئنٹ بی ایف7سمیت اب کوئی بڑی لہر نہیں آئے گی۔
بریفنگ میں نیشنل ڈیزاسٹر مینجمنٹ اتھارٹی کو اس بات کا یقین دلایا گیا کہ پاکستان کی 90 فیصد آبادی کو کورونا ویکسین لگ چکی ہے اب لوگ محفوظ ہیں۔
این سی او سی حکام کا کہنا تھا کہ نئے ویریئنٹ سے متاثرہ افراد کو چند دنوں کیلئے بالائی نظام تنفس میں تکلیف ہوسکتی ہے تاہم اس پر قابو پانے میں کوئی مشکل درپیش نہیں۔
نیشنل ڈیزاسٹر مینجمنٹ اتھارٹی نے متعلقہ حکام کو اسپتالوں کورونا وائرس کو بہتر بنانے کی ہدایت دیتے ہوئے کہا کہ اسپتالوں میں وینٹی لیٹرز، آکسیجن سپلائی اور اینٹی وائرل ادویات کی یقینی بنائی جائے۔
اجلاس میں وفاقی، صوبائی صحت، محکمہ موسمیات کے نمائندوں سمیت وزارت موسمیاتی تبدیلی حکام و دیگر نے بھی شرکت کی۔
