معروف پاکستانی اداکارہ نیلم منیر نے شادی کے چند ہفتوں بعد ہی شوبز میں واپسی کا اعلان کردیا۔
فوٹو اور ویڈیو شیئرنگ ایپ انسٹاگرام پر اداکارہ نیلم منیر نے تصویر شیئر کی جس میں انہیں میک اپ کرواتے ہوئے دیکھا جاسکتا ہے۔
انہوں نے تصویر شیئر کرتے ہوئے کیپشن میں لکھا کہ ’میں شاندار وقت گزار کر واپس آگئی ہوں اور اب کام کرنے کے لیے ایک نئی سوچ کے ساتھ پرجوش ہوں۔
نیلم منیر نے کہا کہ اداکاری کی وجہ سے اتنی زیادہ محبت ملی ہے اور وہ دوبارہ کام کرکے اس کو مزید بڑھانا چاہتی ہوں۔
اداکارہ نے شادی پر مبارکباد اور دعائیں دینے والے مداحوں کا شکریہ ادا کیا اور بتایا کہ وہ پہلے کی طرح کام کرنے کے لیے تیار ہیں۔
نیلم نے اپنے مداحوں، رشتے داروں، عزیزوں کے ساتھ انڈسٹری کے دوستوں اور سوشل میڈیا انفلوئنسز کا بھی سپورٹ کرنے پر شکریہ ادا کیا۔
متعدد شوبز ویب سائٹس، اداکاروں اور یوٹیوبرز کے مطابق نیلم منیر نے پنجاب کے شہری محمد راشد سے شادی کی ہے جو کہ دبئی میں اپنا کاروبار کرتے ہیں۔
اداکارہ کی شادی کے بعد ان کے دیور ہونے کا دعویٰ کرنے والے شخص بھی سامنے آئے تھے، جنہوں نے بتایا تھا کہ ان کے بھائی سے اداکارہ کے ڈھائی سال سے تعلقات تھے۔
زیادہ تر افراد کا خیال ہے کہ نیلم منیر نے 2024 کے اختتام پر شادی کی تھی، تاہم انہوں نے اس کی تصدیق کچھ دن بعد کی لیکن اس حوالے سے اداکارہ نے کوئی وضاحت نہیں کی اور اب انہوں نے شادی کے بعد کام پر واپسی کردی۔
