کراچی: سکھر کے قریب کراچی ایکسپریس کی ایک بوگی میں آگ لگنے کے واقعے میں ریلوے پولیس اور عملے کی غفلت سامنے آ گئی ہے، واقعے میں 7 افراد جانوں سے ہاتھ دھو بیٹھے تھے۔
اے آر وائی نیوز کے مطابق لاہور جانے والی کراچی ایکسپریس کی بوگی میں جب آگ لگی تو اس آگ کو بھڑکنے میں تقریباً 15 منٹ لگے تھے، تاہم ٹرین میں موجود عملے نے نہ آگ بجھائی، نہ ہی ٹرین رکوانے کے لیے بروقت ایمرجنسی میں کچھ کیا۔
ذرائع کا کہنا ہے کہ ریلوے پولیس اہل کاروں اور عملے کے پاس مسافروں کو ریسکیو کرنے کے لیے وقت تھا، تاہم بوگی میں آگ بجھانے کے آلات سمیت کوئی مناسب انتظام نہیں تھا، اس لیے ریلوے عملہ آگ بجھانے والا فائر سلنڈر تلاش کرتا رہا، تب تک آگ پھیل گئی۔
ذرائع کے مطابق بر وقت آگ کی اطلاع دینے اور ہنگامی ریسکیو کرنے سے مسافروں کی جانیں بچ سکتی تھیں، واضح رہے کہ تیزگام میں آگ لگنے کے بعد ہر ٹرین میں آگ بجھانے کے آلات لازمی قرار دیے گئے تھے۔
کراچی سے لاہور جانے والی کراچی ایکسپریس کی بوگی میں خوفناک آتشزدگی، 7 افراد جاں بحق
ایک ریلوے ملازم نے بتایا کہ ٹرینوں کی تاخیر کی وجہ سے انھیں نہ صفائی، نہ الیکٹرک وائرنگ نہ تکنیکی جائزہ لینے کا وقت ملتا ہے۔
خیال رہے کہ کراچی ایکسپریس میں آگ لگنے سے 3 بچوں سمیت 7 افراد جاں بحق ہو گئے تھے، آگ لگتے ہی مسافروں نے ٹرین رکنے تک چلتی ٹرین سے بھی چھلانگیں لگائیں، جس سے کئی افراد زخمی ہوئے جو گمبٹ اسپتال میں زیر علاج ہیں، تاہم ایک بزرگ خاتون زخمی ہونے کے بعد جاں بر نہ ہو سکیں۔
