نیشنل الیکٹرک پاور ریگولیٹری اتھارٹی (نیپرا) نے کے۔ الیکٹرک کی عبوری ماہانہ فیول چارجز ایڈجسٹمنٹ (ایف سی اے) کی درخواست پر اپنا فیصلہ جاری کردیا ہے، جس میں دسمبر 2024 کے لیے 3روپے فی کلو واٹ کا ریلیف دیا گیا ہے۔ یہ ریلیف صارفین کو اُن کے مارچ 2025ء کے بلوں کے ذریعے منتقل کیا جائےگا۔
نیپرا نے عبوری طور پر 2.01 ارب روپے کی رقم برقرار رکھی ہے جو جزوی لوڈ، اوپن سائیکل، degradation curvesاور اسٹارٹ اَپ لاگت کی مد میں ایڈجسٹمنٹ کے لیے مختص کی گئی ہے۔
یہ اقدام نیپرا کے فیصلے کے مطابق کیا گیا ہے جو جولائی 2023 سے جاری کنٹرول پیریڈ کے لیے جنریشن ٹیرف سے متعلق ہے۔ دسمبر 2024ء میں یہ رقم کے۔ الیکٹرک کے زیر التواء کلیمز کے خلاف ایڈجسٹ کی جائے گی جس کا مقصد اس بات کو یقینی بنانا ہے کہ صارفین پر اضافی بوجھ نہ پڑے۔
فیول چارجز ایڈجسٹمنٹ بجلی کی پیداوار میں استعمال ہونے والے ایندھن کی عالمی سطح پر قیمتوں کے اتار چڑھاؤ اور جنریشن مکس پر منحصر ہوتا ہے۔ یہ اخراجات نیپرا کی جانچ پڑتال اور منظوری کے بعد صارفین کو اُن کے بلوں کے ذریعے منتقل کیا جاتا ہے۔ عالمی سطح پر ایندھن کی قیمتوں میں کمی کا فائدہ صارفین کو منفی ایف سی اے کی صورت میں منتقل کیا جاتا ہے۔صارفین سے بلوں کے ذریعے وصول کی جانے والی رقم کا تعین نیپرا اتھارٹی کرتی ہے جب کہ حکومت پاکستان کی جانب سے اس کا نوٹیفکیشن جاری کیا جاتا ہے۔
ریگولیٹری اتھارٹی کے فیصلے کے مطابق ایف سی اے کا اطلاق لائف لائن صارفین، ڈومیسٹک پروٹیکٹڈ صارفین، الیکٹرک وہیکل چارجز اسٹیشنز (EVCS) اورپری پیڈ صارفین کے علاوہ تمام کیٹیگریز کے صارفین ہوگا جنہوں نے پری پیڈ ٹیرف کا انتخاب کیا ہے۔
