امیر جماعت اسلامی کراچی منعم ظفر خان کےالیکٹرک سے متعلق فیصلے پر نیپرا کے چیئرمین کو خط لکھ دیا۔
خط میں منعم ظفر خان کا کہنا ہے کہ کے-الیکٹرک کی ناکامی کا بوجھ عوام پر ڈالنا ظلم ہے،کراچی دشمن نیپرا کا فیصلہ مسترد کرتے ہیں، نیپرا کا کے-الیکٹرک کو ریکوری نقصانات صارفین کے بلوں میں شامل کرنے کا فیصلہ ناقابلِ قبول ہے۔
منعم ظفر خان نے کہا کہ کراچی والوں کو 40 روپے فی یونٹ بجلی جب کہ باقی ملک کا ٹیرف صرف 35 روپے ہے، نیپرا کا دہرا معیار اور متعصبانہ فیصلہ ہے۔
ان کا کہنا تھا کہ نیپرا کا کراچی دشمن فیصلہ کسی صورت قبول نہیں، کے-الیکٹرک کو ملک بھر سے مہنگا ٹیرف دے دیا گیا، کے-الیکٹرک بلا تعطل بجلی کی فراہمی میں اور نیپرا کراچی کے صارفین کا تحفظ کرنے کی آئینی ذمہ داری پوری کرنے میں ناکام ثابت ہوئی ہیں۔
امیر جماعت اسلامی نے کہا کہ شدید گرمی میں بدترین لوڈشیڈنگ پر نیپرا اور حکومت مجرمانہ خاموشی اختیار کیے ہوئے ہیں۔
