دوحہ: غزہ میں جنگ بندی کے لیے امریکا، مصر اور قطر کی ثَالثی کی کوششیں جاری ہیں، اسرائیل کے وزیر اعظم نیتن یاہو نے جنگ بندی مذاکرات کے لیے موساد چیف کو قطر بھیج دیا ہے۔
غیر ملکی میڈیا رپورٹس کے مطابق اسرائیل ایک جانب نہتے فلسطینیوں پر مسلسل مہلک حملے کر رہا ہے، تو دوسری جانب تل ابیب کا اعلیٰ سطح مذاکراتی وفد قطر پہنچا ہے۔
اسرائیلی وزیر اعظم نیتن یاہو نے جنگ بندی مذاکرات کے لیے موساد کے سربراہ ڈیوڈ برنیا کو قطر بھیجا ہے، اسرائیل کے فوجی اور سیاسی مشیر بھی قطر پہنچ رہے ہیں۔ موساد سربراہ قطری حکام سے جنگ بندی سے متعلق بات چیت کریں گے۔
اسرائیلی حکام کا کہنا ہے کہ جنگ بندی مذاکرات میں پیش رفت کا امکان ہے، جنگ بندی مذاکرات کے بعد فوجیوں کا انخلا یقینی بنایا جائے گا، نو منتخب امریکی صدر ڈونلڈ ٹرمپ کے خصوصی نمائندہ برائے مشرق وسطیٰ اسٹیووٹکوف نے بھی اسرائیل کا دورہ کیا ہے، جہاں انھوں نے وزیر اعظم نیتن یاہو سے ملاقات کی، اور غزہ جنگ بندی معاہدہ کرنے پر بات کی گئی۔
غزہ جنگ : بم دھماکے میں 4 اسرائیلی فوجی ہلاک، 5 زخمی
ادھر شمالی غزہ میں حماس سے لڑائی میں 4 اسرائیلی فوجی ہلاک اور 6 زخمی ہوئے ہیں، اسرائیلی ڈیفنس فورسز نے تصدیق کرتے ہوئے بتایا کہ فوجیوں کو بیت حنون میں سڑک کنارے نصب بم دھماکے میں نشانہ بنایا گیا۔ فائرنگ سے بھی فوجی ہلاک اور زخمی ہوئے، زخمیوں میں 2 کی حالت تشویش ناک ہے۔
دوسری جانب سے اسرائیلی طیاروں نے اسکول پر بمباری کی، جس میں 32 فلسطینی شہید اور 200 زخمی ہوئے۔ نصیرات میں صہیونی فوج کی فائرنگ سے ایک اور صحافی شہید ہو گیا ہے۔ سول ڈیفنس کا کہنا ہے غزہ میں اسرائیلی طیاروں سے ممنوعہ ہتھیاروں کی بمباری سے 7 ہزار 820 لاشیں بخارات میں تحلیل ہو گئیں۔
غزہ کی وزارت صحت کے ڈائریکٹر جنرل ڈاکٹر منیر البراش نے بتایا کہ بعض حملوں میں دھماکے کا درجہ حرارت 4 ہزار ڈگری سے زیادہ تھا۔ التابعین اسکول پر فجر کے وقت کے حملے میں بھی ایسا ہی ہوا اور بہت سی لاشیں ختم ہو گئیں۔
تل ابیب میں اسرائیلی فوجی ہیڈ کوارٹرز کے باہر ہزاروں افراد نے نیتن یاہو کی حکومت کے خلاف مظاہرہ کیا۔ اسرائیلی پولیس اور مظاہرین کے درمیان جھڑپیں ہوئیں۔ دو مظاہرین کو گرفتار کر لیا گیا۔
